Senat Tóraǵasy Sátbaev pen Shornaqtaǵy oqıǵaǵa qatysty pikir bildirdi. Bul jóninde ol facebook-tegi paraqshasyna jazdy.

"Sátbaevtaǵy jaǵdaıǵa qatysty qoǵamnyń narazylyǵy oryndy. Rasymen, bul oqıǵa bárimizdiń júregimizdi aýyrtyp, janymyzdy jabyrqatty. Barlyq ata-analardyń ashýy men yzasy da túsinikti. Degenmen, osyndaı qylmyskerlerdi jazalaý zań negizinde júrgizilýi kerek. Búldirshinge zorlyq-zombylyq kórsetkender zań aldynda qatań jaýap beredi. Ol – aqıqat nárse. Eshkimniń buǵan kúmáni bolmaýy kerek", – delingen senat spıkeriniń jazbasynda.

Sonymen qatar Máýlen Áshimbaev zorlyq-zombylyq kórsetkenderdi aýyr jaza kútip turǵanyna nazar aýdarǵan.

"Byltyr Memleket basshysy halyqqa Joldaýynda bala quqyǵyn qorǵaý máselesine aıryqsha nazar aýdaryp, olarǵa qatysty jasalatyn qylmystarǵa jazany kúsheıtý týraly tapsyrma bergen bolatyn. Soǵan baılanysty Parlament Qylmystyq kodekske irgeli ózgerister engizdi. Búginde búldirshinderge qatysty jasalǵan zorlyq-zombylyq faktisi boıynsha qylmysker jıyrma jylǵa nemese ómir boıyna bas bostandyǵynan aıyrylýy múmkin.

Sonymen qatar, zorlyq-zombylyq áreketi orta sanattan aýyr dárejeli qylmys túrine ózgertildi. Mundaı jaǵdaıda taraptar tatýlasa almaıdy. Burynǵy tájirıbede taraptardyń ózara tatýlasýynyń nátıjesinde talaı adamnyń qylmystan jaltaryp ketkeni belgili. Endi ondaı olqylyqqa jol joq.

Jańa zań normalaryna sáıkes mundaı qylmys jasaǵandar túrmeden merziminen buryn bosap ta shyǵa almaıdy, raqymshylyqqa da ilinbeıdi. Sondyqtan qoldanystaǵy zańnama boıynsha qylmyskerlerdi bultartpas aýyr jaza kútip tur", – dep jazǵan senat tóraǵasy.

Sondaı-aq, ol Túrkistan oblysynyń Shornaq aýylyndaǵy jaǵdaıǵa nazar aýdaryp, osy oqıǵany etnosaralyq janjalǵa aınaldyrǵysy keletinderdiń jelilerde jalǵan aqparattar taratyp júrgenin atap ótken.