Tanymal ǵalym, «Altyn adamdy» alǵash tapqan arheolog, Bekmuhanbet Nurmuhanbetov dúnıeden ozdy, – dep habarlaıdy Qamshy.kz.
Ǵalymnyń keshe saǵat 23.30-da qaıtys bolǵany habarlandy.
Bekmuhanbet Nurmuhanbetov 1935 jyly 17 mamyrda Almaty oblysynda dúnıege kelgen. Qazaq memlekettik ýnıversıteti tarıh fakúltetiniń túlegi. 1969 jyly jas arheolog jetekshisi Kemel Aqyshev ekeýi Esik qorǵanynan ǵajaıyp tarıhı eskertkish tapqan edi.
Ǵalymnyń zertteýshilik joly qola dáýirinen (b.z.b. 14 ǵ.) ortaǵasyrlyq (b.z. 10 – 12 ǵ-lar) kezeńderge deıingi aralyqty qamtydy. Qańly zamanyn (b.z. 2 – 4 ǵ-lar), kóne túrki dáýirin (b.z. 4 – 8 ǵ-lar) turaqty zerttedi. Atap aıtqanda, Otyrar óńiriniń Kókmardan, Kúıikmardan qalalarynyń jurttaryndaǵy zırattarǵa, Arys óz. boıyndaǵy Bórijar, Qaraaspan, Bógen obalarynda qazba jumystaryn júrgizdi. Kóne muralardy qorǵaý jáne paıdalaný jumystaryn jolǵa qoıý maqsatymen 1980 j. jedel kómek tobyn qurdy. Bul shaǵyn top keıin Qazaqstan aýmaǵyn túgel qamtyp, saq qorǵandary Shubart, Molaly, Qyrǵaýyldy, Boraldaı, Esik, Túrgen obalaryn qamqorlyqqa aldy. 1999 jyly Almaty oblysy Eńbekshiqazaq aýdanynda “Altyn adam” Urpaqtar sabaqtastyǵy asosıasıasyn qurdy. Asosıasıanyń basty maqsaty – “Altyn adam” tabylǵan Esik obalaryn ashyq aspan astyndaǵy murajaı-qoryqqa aınaldyrý. Bekmuhanbet Nurmuhanbetov ómiriniń sońǵy kúnderine deıin osy obalardyń qoǵamdyq negizdegi shyraqshysy mindetin atqaryp keldi. Arheolog-ǵalymnyń 50 shaqty ǵylymı maqalalary, kópshilikke arnalǵan 200-deı materıaldary jaryq kórgen.
