Úkimet janynan qurylǵan Jer reformasy jónindegi komısıanyń jumysy besinshi otyrysqa kelgende úzildi. Tórtinshi márte Kókshetaýda bas qosqan komısıanyń senbi kúngi kezekti otyrysynyń ne sebepti ótpeı qalǵanyn anyqtaýǵa tyrystyq.
Máseleniń mánisin bilmekke resmı aqparat surap Jer zańnamalaryn túsindirý jónindegi 1434 nómirli sall-ortalyqqa habarlasqanymyzda telefonıst qyz bizge Jer reformasy jónindegi komısıanyń hatshylyǵyna (tel. nómiri: 87172 555978) habarlasýǵa keńes berdi. Onda tutqany alǵan Erjan Býhbanov (ózin jer komıtetiniń basshysy dep tanystyrdy – red.) komısıanyń senbidegi otyrysy nege ótpeı qalǵany men kelesi otyrysy týraly málimetti tústen keıin ǵana naqtylaı alatynyn, tıisti laýazym ıeleri sol kezde keletinin aıtty. Túske deıin bir habary bolar degen úmitpen basqa kózderden alǵan málimettermen bólisemiz.
Á degende ár senbi saıyn jınalyp turýy tıis, quramynda tórt birdeı jumys toby bar komısıanyń kezekti otyrysynyń ótpeı qalýyna komısıa jetekshisi, birinshi vıse-premer Baqytjan Saǵyntaevtyń jumys kestesiniń tyǵyzdyǵy sebep bolýy múmkin.
Úkimet janyndaǵy komısıanyń taǵy bir múshesi Muhtar Taıjan da bul máseleden tolyq habardar emestigin aıtty.
Óziniń Feısbýktegi paraqshasynda ol: «Komısıa ne boldy, nege kezekti otyrys bolǵan joq dep lıchkamen meni kóp surap jatyr. Jaýabym - men bilmedim. Ótken aptada shtabqa tel soqtym, naqty jaýap bergen joq. Biraq óz basym jumysty jalǵastyraı berem», - dep jazdy.
Ótken demalystarda Almaty oblysy Sheńgeldi aýlynda, Jambyl oblysynyń Qordaı aýyldarynda bolyp qaıtqan ol, 90-jyldary jerdi bólý, paı úlestirý naýqanyna baılanysty birqatar máseleler bar ekenin, latıfýndıserdiń qandaı jolmen paıda bolǵanyn aýyl turǵyndarynan estip jatqanyn aıtady.
Komısıa múshesi Dos Kóshim Abai.kz – ke tilshisine komısıa jumysyna bulaı nemquraıly qaraıtyndarǵa kóńili tolmaıtynyn aıtypty.
«Negizi jer komısıasynyń otyrystaryn ótkizý jumysy Aýylsharýashylyq mınıstrligine júktelgen. Otyrystyń nege ótpeı qalǵanyn solardan suraý kerek. Menińshe, kezekti jınalystyń ótpeı qalýy Baqytjan Saǵyntaevtiń qolynyń bosamaýy sebep bolǵan bolýy kerek. Bálkim, Aqtóbedegi lankestik árekettiń áseri bolǵan shyǵar. Dese de, qandaı jaǵdaı bolmasyn, bul otyrystardyń ótýi qajet edi, jumysynyń toqtamaǵanyn durys.
Meniń kóńilim tolmaıtyn biraz dúnıeler bar. Ótkende ol jaıdyń birazynyń shet-jaǵasyn aıttym da. Jer komısıasynyń óńirlerde ótetin jınalysy Kókshetaýdan, ıaǵnı, Aqmola oblysynan bastaldy. Endi Shyǵys Qazaqstan, Pavlodar sekildi oblystarda ótpek. Bul komısıa nege alǵashqy jıyndardy mıtıńter ótken Atyraý men Aqtóbeden bastamaıdy? Nege sol jaqtyń pikirin aldymen bilmeımiz? Bul birinshi másele», - degen D. Kóshim komısıadaǵy keıbir uıymdastyrý máselelerindegi shıkilikterge de toqtalypty.
«Barlyq jumys komısıanyń tóraǵasy Baqytjan Saǵyntaevtiń qolynyń bos bolýyna baılanysty júrgizilip jatqan sıaqty. Komısıanyń tóraǵasy bolǵan soń, ol kisi búkil jıynǵa qatysý kerektigi aıtylǵan edi. Negizi mundaı keshendi jumys jasalarda arnaıy joba bekitilýi kerek. Qaı ýaqytta qandaı jıyn ótedi, komısıa qandaı óńirge barady, barlyǵy derlik qattalyp, arnaıy keste daıyndalýy kerek. Munyń biri de qolǵa alynbaǵan. Biz , komısıa quramyndaǵy azamattar, ózimizdiń jumysty qalaı josparlarymyzdy bilmeı otyrmyz. Eger komısıa jumysynyń arnaıy kestesi bolsa, biz bar isimizdi soǵan yńǵaılar edik», - deıdi ol.
Komısıa otyrysynyń alǵash ret ótpeı qalyp otyrǵanyn alǵa tartqan Dos Kóshim ázirge bul týraly dabyra qylýdyń qajeti joq deıdi.
Osylaısha, Úkimet janyndaǵy komısıanyń ótpeı qalǵan otyrysy men aldaǵy jumysy týraly resmı oryndardan tushymdy jaýap alý múmkin bolmaı otyr. Qazir jer máselesine baılanysty qurylǵan jerturaly.kz saıty ashylyp turǵanymen, onda sońǵy materıal 08 maýsym kúni saǵat 21.08-de salynǵan eken.
Darhan Muqantegi
