Ýkraınanyń Qazaqstandaǵy elshiligi ýkraındyq saıasatker Irına Farıondy «saldaqy» dep aıyptaǵan Qazaqstan Parlament Májilisiniń vıse-spıkeri Vladımır Bojkoǵa jaýap berdi, - dep habarlaıdy Qamshy.kz.
Buǵan deıin Vladımır Bojko Qazaqstandaǵy orys tiliniń ahýalyna alańdaýshylyq bildire otyryp, til saıasatyna Ýkraınany mysal etken bolatyn. Sondaǵy sózinde Májilis vıse-spıkeri ýkraındyq ultshyl Irına Farıondy «saldaqy» dep balaǵattaǵan edi.
Bir qyzyǵy elshiliktiń joldaǵan jaýabynda V. Bojkonyń da, qoǵam qaıratkeri Irına Farıonnyń da aty atalmaǵan. Hattyń V. Bojkoǵa qatysty ekenin bul kıkiljińnen beıhabar azamattar ondaǵy «áldebir MQK (KGB) joǵary mektebiniń túlegi» degen tirkesten ańǵarýǵa bolady.
«Birer kún buryn KSRO MQK joǵary mektebiniń bir túlegi, Qazaqstannyń ońtústigindegi orys tili týraly dabyl qaǵa otyryp, ýkraınalyq áıeldi janamalaı qorlady. Ol Ýkraınanyń tanymal qoǵam qaıratkeri, Fransıa, Germanıa, Polshadaǵy, basqa da órkenıetti elderdegi áriptesteri sıaqty memlekettik til, tıtýldy ulttyń tilin qorǵap júrgen Irına Farıonǵa qarata «Saldaqy» degen sózdi qoldandy. «Saldaqy» sózi bul jerde ol baǵyttalǵan obektini emes, ony aıtqan sýbektini sıpattaıdy. Bul sózdiń tasasyna tutas álem – adam quqyǵyn saqtamaıtyn, ózgeshe oılaýǵa tózimsizdik tanytatyn agresııa jasyrynyp tur», - delingen hatta.
Odan ári elshilik «Orys álemi» jobasyn synǵa alyp, Ýkraına jerin jaýlap alýshylyqty aıyptaıdy.
Saıası máselelerdi aıta kelip, hat avtorlary áskerıler arasynda jıi aıtylatyn «ofıserlik abyroı» uǵymyna toqtalyp, MQK ofıserin de, onyń qorǵap otyrǵan «Orys álemin» de túırep ótken.
«Qazirgi ýkraındyqtar orystyń klasıkalyq ádebıetin oqyp ósti. Ol kitaptarda ofıserlerge (tek olarǵa ǵana emes) áıeldi «saldaqy» dep ataýǵa ruqsat berilmegen. Biraq, ofıserlik abyroı uǵymy «Orys áleminiń» qundylyqtaryna qaıdan qatysty bolsyn», - delingen hatta.
Dıplomatıalyq mısıa haty: «Qazaqstan halqy ana tilinde sóıleý quqyǵyn qorǵap júrgen analaryn, áıelderi men qyzdaryn «Orys áleminiń» ókilderine saldaqy dep atatýdy ózderi sheshedi», - degen sózdermen aıaqtalǵan.
