Aqpan aıynyń sońynda álem turǵyndary túngi aspanda sırek kezdesetin astronomıalyq qubylysty tamashalaı alady. 28 aqpanda Merkýrıı, Sholpan (Venera), Mars, Iýpıter, Satýrn, Ýran jáne Neptýn bir syzyq boıynda ornalasyp,  «ǵalamsharlar sherýin» qalyptastyrady.

NASA málimetinshe, mundaı planetalyq tizilý birneshe ǵalamshar Jerden qaraǵanda bir jazyqtyqta kóringen kezde paıda bolady. Bul – tek kózge kórinetin áser, shyn máninde ǵalamsharlar bir-birinen mıllıondaǵan, tipti mıllıardtaǵan shaqyrym qashyqtyqta ornalasqan.

28 aqpan – eń áserli kún. Sol kúni planetalar bir-birine barynsha jaqyn kórinedi. Tórt planetany (Merkýrıı, Sholpan, Mars, Iýpıter) jaı kózben kórýge bolady. Al Ýran men Neptýndy kórý úshin dúrbi nemese teleskop qajet.

Astronomdar ǵalamsharlardy kún batqannan keıin shamamen 30 mınýt ótken soń, batys kókjıekke jaqyn, ashyq ári kedergisiz jerde baqylaýǵa keńes beredi.

Bul qubylys búkil álemde kórinedi. Keıbir elderde eń jaqsy kórinetin kúnder sál ózgesheleý bolýy múmkin, alaıda aqpannyń sońǵy aptasy – baqylaýǵa eń qolaıly kezeń.

Aıta keteıik, 2025 jyly jeti ǵalamshar bir qatarǵa tizilgen bolatyn. Mundaı aýqymdy kórinis endi tek 2040 jyly ǵana qaıtalanady.