Qazaqta «qalypqa salma, halyqqa sal» degen jaqsy sóz bar. Jalpy Qazaqstan úshin 2026 jyl taǵdyrsheshti sheshimder qabyldaıtyn jylǵa aınalatyn túri bar. Bul ishki saıasatqa da, syrtqy saıasatqa da qatysty boljam.

İshki saıasatta – Konstıtýsıa qabyldaý, parlamenttik saılaý ótkizý, saıası qurylymdarǵa ózgerister engizý t.b. bolsa, syrtqy saıasatta – jańa manevrlerdi izdeýde belsendilik artady. Qazirgideı, gegemondar ózara bilek kúshterin synasyp, álemdik bóliniske árekettenip jatqan tusta, bizge keregi turaqtylyq pen tynyshtyq. Ol úshin keregi – barynsha teńgerimdi hám esepke, memlekettik múddege negizdelgen, rasıonaldy, pragmatıkalyq syrtqy saıasat.

Álbette, bıylǵy jylashar basty oqıǵalarynyń biri -  Konstıtýsıa qabyldaý isi. Jalpy Táýelsizdik jyldary qabyldanǵan eki Konstıtýsıa da elimizdiń memleket bolyp qalyptasýy jolyndaǵy óz fýnksıalar tolyq atqarǵan qujattar boldy. Bular – Qazaqstannyń ishki saıası júıesin kúsheıtýden bólek, Batys talaptaryna negizdelgen, elimizdegi jekeshelendirýden bastap, naryqtyq qatynastardy túbegeıli ornyqtyrýǵa qyzmet etken, sheteldik ınvestısıanyń Qazaqstanǵa aǵylyp quıylýyna qyzmet etken Konstıtýsıalar boldy. Odan beri de otyz jyl ýaqyt ótti. Qazir álemdik geosaıasatta kóz ilispes jyldamdyqpen ózgerister júrip jatyr. Jańa tendensıalar týylýda. Solardyń biri – qazba-baılyq, sırek metaldar úshin kúres. Osyǵan deıin Qazaqstan batys pen shyǵystyń, soltústiktiń alpaýyttarymen jasaǵan qupıa kelisimderdiń merzimi aıaqtalýǵa jaqyn qaldy. Alpaýyttarǵa maı asatyp, qazaqqa qasyq jalatqan sol kelisimderdiń egjeı-tegjeıi áli qupıa saqtalýda. Búgingi Qazaqstan halqy sol qupıa kelisimderdi jarıa etýdi talap etýde. Bul zańdy talap!

Sonymen qatar, jańa kelisimderde Qazaqstannyń múddesine basymdyq berý, ıntegrasıanyń balamaly baǵyttaryn izdeý, logıstıkaǵa kúsh salý, transport, týrızm, tereńdep óńdeý, sıfrlyq damý salalaryna ekpin túsirý t.b. sheshimder qabyldaýy kerek. Bul da ýaqyt talaby. Osy baǵyttardyń úrdiske, naqty iske aınalýy úshin, adam qundylyǵyn qorǵap, qoǵamnyń damýy men turaqtylyǵyn saqtaýǵa kepil bolatyn qujat – Konstıtýsıa...

Álginde AQSH-tyń Memlekettik hatshysy Marko Rýbıo Múnhendegi jıynda bylaı dedi: «Eski álem endi joq. Ol kóz aldymyzda ózgerip jatyr. Biz geosaıasattyń jańa erasynda ómir súrip jatyrmyz. Jáne árbirimiz osy ózgeristerdiń ishinde árbirimizdiń atqaratyn rólimiz qandaı bolýy kerek degen suraqqa jaýap izdeýimizge týra keledi», - dedi.

Ýaqyt eshqashan bir orynda turmaıdy. Onymen birge qoǵam da, sana da, talap ta ózgeredi. Keshe ǵana minsiz kóringen zań búgin eskirip qalýy múmkin. Sondyqtan bul reformalardyń fılosofıasy – memlekettiń óz dáýirine beıimdelý áreketi bolýy kerek dep oılaımyn...