Almaty oblysynda «Móldir bulaq» ekologıalyq aksıasy keń kólemde uıymdastyrylyp, óńirdiń tabıǵı sý kózderin saqtaý men jańǵyrtýǵa baǵyttalǵan aýqymdy jumys júrgizildi. Igi bastamaǵa 1500-ge jýyq adam qatysyp, 300-den astam aǵash kósheti otyrǵyzyldy.
Aksıa barysynda óńirdegi birneshe mańyzdy bulaq kózi ashyldy. Atap aıtqanda, Eńbekshiqazaq aýdany Eńbek aýylynda ornalasqan, jergilikti halyq aýyz sý retinde paıdalanatyn bulaq tazartylyp, aýmaǵyn abattandyrý, aǵash otyrǵyzý jáne qorshaý ornatý jumystary qolǵa alyndy. Malybaı aýyldyq okrýgine qarasty taýdyń eteginde ornalasqan Shıli bastaý bulaǵynyń bastaýy men arnasy tazartylyp, negizinen mal sýarýǵa paıdalanylatyn sý kóziniń tabıǵı qalpy jaqsartyldy. Qarajota aýyldyq okrýgindegi tarıhı mańyzy bar Dıirmen bazy bulaǵynda da tazalaý jumystary júrgizilip, bulaqtyń bastaýy men sý júretin arnasy retke keltirildi. Taýqaraturyq aýylyna jaqyn ornalasqan Qurtty bulaǵynyń kózi ashylyp, sanıtarlyq jumystar atqaryldy. Sonymen qatar Talǵar aýdanyndaǵy kıeli oryndardyń biri sanalatyn Álmerek baba bulaǵy da nazardan tys qalǵan joq. Onyń tabıǵı ári rýhanı mańyzyna erekshe kóńil bólindi.
«İle-Alataý» memlekettik ulttyq tabıǵı parki Túrgen shatqalyndaǵy «Kıeli» bulaǵynyń ashylý rásimine Almaty oblysynyń ákimi Marat Sultanǵazıev te qatysyp, bulaq kózin ashý, aǵash otyrǵyzý jumysyna atsalysty.
Marat Eleýsizuly bul Memleket basshysy Qasym-Jomart Toqaevtyń bastamasymen qolǵa alynǵan «Taza Qazaqstan» jalpyulttyq baǵdarlamasy aıasyndaǵy ıgi shara ekenin atap ótti.
«Biz búgin ata-babamyzdan qalǵan «Bulaq kórseń, kózin ash» degen asyl amanatty júzege asyrý maqsatynda jınalyp otyrmyz. Sý - tirshilik kózi. Jerimizdiń berekesi men yrysy. Ásirese kóptegen eldi mekeni taý eteginde ornalasqan Almaty oblysy úshin árbir bastaý men qaınar - strategıalyq mańyzǵa ıe.
Búgingi tańda tirshilik nárin únemdeý jáne olardy taza ustaý – memlekettik deńgeıdegi ózekti másele. Osy sharada bizben birge ıyq tirese eńbektenetin óńir turǵyndarynyń belsendiligi qýantady.
Bul jumystar tek bir kúndik naýqanmen shektelmeıdi. Biz árbir bulaqtyń basyn qorshap, aǵash otyrǵyzyp, sanıtarlyq jaǵdaıyn baqylaýda ustaıtyn bolamyz, – degen oblys ákimi qatysýshylarǵa alǵysyn bildirip, saýapty istiń Ulystyń uly kúni – Naýryz meıramymen tuspa-tus kelýin jaqsy yrymǵa balady.
«Qazsýshar» respýblıkalyq memlekettik kásipornynyń bas dırektory Ánýar Úskenbaev dástúrdi túrde ótkiziletin aksıa bıyl keń aýqymda uıymdastyrylǵanyn aıtyp, sýdy únemdeý, tabıǵatty qorǵaý ortaq jaýapkershilik ekeninen jetkizdi.
Sharaǵa egde jastaǵy turǵyndardan bastap, jastarǵa deıin belsendi atsalysyp, tabıǵatqa janashyrlyqtyń úlgisin kórsetti. Atqarylǵan jumystyń arqasynda bulaq sýy jergilikti halyqtyń ıgiligine aınalyp, sharýashylyǵyna septigin tıgizetin bolady.
Ekologıalyq shara tabıǵatqa qamqorlyq kórsetý ǵana emes, sondaı-aq adam janynyń da tazarýy, júrek kóziniń ashylýy. Sondyqtan mundaı sharalar Almaty oblysynda josparǵa saı júıeli túrde jalǵasady.
