Respýblıkalyq referendým – elimizde júrgizilip jatqan Konstıtýsıalyq reformalardyń sheshýshi kezeńi. Bárimizdiń ortaq bolashaǵymyzǵa qatysty sheshim qabyldanatyn syn saǵatta daýys berýden shet qalmaý – árbir qazaqstandyq úshin mańyzdy borysh. Osy oraıda, qoǵam ómirindegi aıtýly ózgeristerge qatysty túrli salanyń ókilderi óz pikirlerin bildirip jatyr. Olardyń ishinde óner maıtalmandary men sportshylar, shyǵarmashylyq ıeleri de bar.
Belgili estrada juldyzy Ulyqpan Joldasov áleýmettik jelide Konstıtýsıalyq reforma týraly oıyn bildire kele, bunyń elimizdiń damýyna jańa serpin berip qana qoımaı, mádenıet pen óner salasynyń erkin órkendeýine de múmkindik ashatynyn jazdy. 
«Mádenıet – ulttyń rýhanı tiregi. Sondyqtan ulttyq qundylyqtardy saqtap, zamanaýı shyǵarmashylyqpen ushtastyrý – ortaq mindetimiz», dedi ánshi.
Tanymal akter Erbolat Tólegen áleýmettik jelige bólisken beınejazbasynda 15 naýryzda ótetin respýblıkalyq referendým Qazaq eli, óskeleń urpaq úshin mańyzy erekshe, ataýly kún ekenin aıtty.
«Qadirli dostar, zaman ózgerip jatyr, soǵan baılanysty bizdiń Konstıtýsıamyz da jańaryp jatyr. Osy tusta referendýmǵa qatysý – árbir Qazaqstan azamatynyń boryshy ekenin eske salǵym keledi, osy kúnnen qalys qalmańyzdar», dep málimdedi ol.
Teatr jáne kıno akteri Erkebulan Daıyrov elimiz úshin
mańyzdy sheshim qabyldanatyn referendým kúni jańa Konstıtýsıa jobasyna daýys berý – ár azamattyń jaýapkershiligi ekenin jetkizdi. «Men óz tańdaýymdy jasaımyn. Men baramyn!» dep jazdy ol.
Jazýshy Beıbit Sarybaıdyń aıtýynsha, referendým – tek daýys berý kúni ǵana emes, eldiń keleshegin aıqyndaıtyn mańyzdy saıası akt, árbir azamattyń Otan aldyndaǵy paryzy.
«Biz úshin eń qymbat nárse – elimizdiń bolashaǵy, tynyshtyǵy men damýy. 2026 jyldyń 15 naýryzynda respýblıkalyq referendým ótedi. Bul bizdiń árqaısymyz úshin úlken jaýapkershilik pen azamattyq mindet. Bizdiń tańdaýymyz – eldiń quqyqtyq negizine, azamattyq qoǵam men demokratıa negizderine senimimiz ben bolashaǵymyzǵa jasalǵan úles. 15 naýryzda kelip, ózińniń azamattyq ustanymyńa saı sheshim shyǵar! Birge keleshegimizdi qalyptastyraıyq», dep jazdy ol.
Sonymen qatar Beıbit Sarybaı búginde álem qarqyndy ózgerip jatqan ýaqytta, eldiń keleshegi úshin óz tańdaýyńdy jasaý – ózińniń ıdeıań men kózqarasyńdy bildirýdiń naqty joly ekenin, referendýmda ár daýys mańyzdy, ár pikir qundy bolatynyn eske saldy.
Elimizdiń sport sańlaqtary da Konstıtýsıalyq reformalardy talqylaýdan shet qalmady. Olımpıadanyń qola júldegeri, dzúdoshy Ǵusman Qyrǵyzbaev sportta da, ómirde de jetistikke jetýdiń kilti – jaýapkershilik pen tártip ekenin tilge tıek etti.
«Árbir sportshy úshin kók týdy jelbiretý – Otan aldyndaǵy joǵarǵy marapat. Olımpıada tatamıinde búkil halyqtyń demin sezinesiń. Bul seni tabandy bolýǵa, erejeni saqtaı otyryp kúresýge jáne jeńis úshin bar kúsh-jigerińdi salýǵa mindetteıdi. Shynaıy jeńiske temirdeı tártip pen sport erejelerine qurmetpen qaramaı jete almaısyń. Ádil báseke men júıeli tártip qana álemdik deńgeıde moıyndalýǵa jol ashady. Árbir beldesý komandanyń nátıjesi, ár sportshynyń jigeri men úlesine baılanysty ekenin uǵyndyrady. El ishindegi basty jetistikter de ortaq tártipten bastalady. Aldaǵy referendým – búkil Qazaqstan úshin ádil qaǵıdalardy bekitý múmkindigi. Bizdiń bolashaǵymyz – óz qolymyzda!» dep jazdy belgili sportshy.
Álemdik dodada Qazaq eliniń qorjynyna júlde salyp júrgen taǵy bir tanymal dzúdoshymyz Ábıba Ábýjaqynova da alda kele jatqan referendýmnyń mańyzy jaıynda oıymen bólisti. Ol óz sózin ómirdegi kúres tatamıdegi beldesýge uqsaıtynynan bastady.
«Dzúdodaǵy jeńis tatamıdegi ádis jasaýdan emes, erejeni jaqsy bilýden bastalady. Álemdik reıtıńke bastar jolda kezdeısoqtyq bolmaıdy. Árbir ádis, árbir qımyl sansyz jattyǵýdyń jáne sheshýshi sátte tolyq jaýapkershilikti óz moınyńa ala bilýdiń nátıjesi. Tatamıge shyqqanda artyńda mıllıondaǵan úmit turǵanyn sezesiń. Ol saǵan sońyna deıin kúresýge kúsh beredi. Úlken sportta tabys ózińe adal bolyp, tańdaǵan jolyńa berik bolýdan bastalady», degen sportshy bylaıǵy ómir de dál sondaı jaýapkershilikti talap etetinin aıtty.
«Sondyqtan aldaǵy jańa Konstıtýsıa boıynsha referendým – barshamyz úshin mańyzdy tańdaý sáti. Negizgi zańǵa engizilgen ózgerister ár azamatqa ádil múmkindik berip, jastardyń quqyǵyn qorǵaýǵa baǵyttalǵan. 15 naýryzda men elimizdiń bolashaǵyn qorǵap, osy reformalardy qoldap, referendýmǵa qatysamyn», dedi Á.Ábýjaqynova.
Qazaqtyń mańdaıyna bitken shahmatshy qyzy Bıbisara Asaýbaeva da referendýmnan tys qalmaıtynyn ańǵartyp: «Men Qazaqstan atynan óner kórsetetin sportshy retinde ilgeri damıtynymyzǵa senemin, sondaı-aq elimizdiń turaqtylyǵy men keleshegine baǵyttalǵan reformalardy qoldaımyn», dep jazdy.