Tanymal aıtysker aqyndar Jandarbek Bulǵaqov pen Syrym Áýezhan Konstıtýsıalyq reforma men jańa Ata zań jobasyna qatysty aıryqsha tásilmen ún qatty.
Buǵan deıin qoǵamdaǵy aıtýly oqıǵalar týraly keıde qoldap, keıde zildi sózben túırep, ázil-qaljyń túrinde án shyǵaryp oryndap júrgen olar bul joly saıası taqyrypty da qozǵap kórýge bekinse kerek.
Endi aqyndardyń ánmen árlegen jyr joldaryna kezek bersek:
 
«Adam kóp búgin Ata zańdy oılaǵan.
Ol zańdy oqymasa, taldaı ma adam?
Senzýra joq dep tur ǵoı, bárin aıtam,
Baýyrym, áńgimeń bar qandaı maǵan?
Bolamyz qandaı qoǵam?
 
Zańdy aıtyp bizder talaı daýlasyp ek,
Mynanyń ana tilde sharýasy joq.
Oryssha jazyldy ǵoı buryn zańdar,
Qazaqsha zań jazyldy alǵash ret.
Tilimde bar qasıet.
 
Al endi Parlamenttiń qaıda máni?
Ol endi Quryltaıǵa aınalady.
Zań shyqsa, depýtattar azaıady,
Azaısa, kóbeıedi paıdalary.
 
Bireýler toıyp alyp sharabyna,
«Qazaq el bolmaǵan» dep laǵady ma?
«Myń jyldyq tarıhy bar uly dala»
dep jazdyq Ata zańnyń paraǵyna.
Bizdiki dala myna!
 
Sózińnen seniń bireý qaımyqty ma?
Keń dalań tıesili qaı myqtyǵa?
Bul zań da «halyqtiki» dep jazdyrdyq,
jerdi de, jerdegi bar baılyqty da.
Baǵytty qoıdyq týra!
 
Báriniń referendým oılaǵany,
Zıan ba bireýdiń qol qoımaǵany?
Bir elge aınalǵanda búkil qazaq,
Uly elge ǵalamdaǵy aınalady.
 
Jigit kóp qyz sekildi qylyqtary,
Qandaı zań arsyzdardy quryqtady.
Bul zańda er men áıel ǵana úılenip,
toqtaıdy qyztekeniń bylyqtary.
Ketedi quryp bári.
 
Ózgerip kúnde zań men baptarymyz,
Baqytty qashan keledi shaqtarymyz?
Baq degen dál osylaı beıbit elde
án aıtyp, zańdy taldap jatqanyńyz.
Búlikten saqtanyńyz!
 
Sı Szınpın, Pýtınniń kóp aılalary,
Tramptyń bolmaı jatyr qaı qalaýy?
Toqaev tynyshtyqpen basqaryp tur,
jatqanda soǵys qaptap aınalany.
El aman bolsa, kúnde toı bolady!».
 
Aqyndar posttyń astyna: «Memleketimiz mańyzdy kezeńderden abyroımen ótip, azattyǵymyz máńgi bolsyn! Er azamattarymyz otbasynyń da, Otannyń da aldyndaǵy jaýapkershilikti sezinip, urpaq pen ultqa qorǵan bolsyn! Sábılerimiz jylamaı, qazaqtyń ár arýy mahabbatqa pen meıirimge shomylyp, baqytty ǵumyr keshsin! Elimiz aman, jurtymyz tynysh bolsyn!» dep jazdy.