«Qyz tárbıesi – ult tárbıesi» degen halqymyzdyń tereń maǵynaly danalyq sózi qyz balanyń bolashaq ana, otbasynyń uıytqysy, urpaq tárbıesiniń negizin qalaýshy ekenin aıqyndaıdy. Jaratylysynan názik, sezimtal ári áserge beıim qyz balanyń tárbıesi – qoǵam bolashaǵyna tikeleı yqpal etetin mańyzdy qundylyq.
Osy baǵytta jas urpaqtyń tárbıesine, ásirese qyz balalardyń boıyna ulttyq jáne zamanaýı qundylyqtardy qatar sińirýge úles qosyp kele jatqan uıymdardyń biri – «Senimen Bolashaq» respýblıkalyq qoǵamdyq birlestigi. Uıymnyń bastamasymen Almaty qalasy Áýezov aýdanyndaǵy №141 jalpy bilim beretin mektepte 9–11 synyp oqýshylaryna arnalǵan kezekti semınar-trenıng ótti.
Sharany mektep dırektorynyń tárbıe isi jónindegi orynbasary Ýspanova Aıgúl Qazbekqyzy ashyp, kezdesýdiń mańyzy men maqsatyna toqtalyp ótti. Ol qyz balanyń tárbıesi – tek otbasynyń emes, tutas qoǵamnyń jaýapkershiligi ekenin atap ótti.
Semınar barysynda «Senimen Bolashaq» RQB Almaty fılıalynyń jetekshisi Merýert Máýletqyzy zamanaýı qazaq qyzynyń áleýmettik jáne etnoáleýmettik beınesin jan-jaqty taldap, búgingi qoǵamdaǵy qyz balanyń róline toqtaldy. Ol qyzdardyń kóshbasshylyq qabiletin damyta otyryp, ulttyq qundylyqtardan ajyramaýdyń mańyzyn erekshe atap ótti.
– Qyz bala – bolashaq ana, bolashaq jar ǵana emes, ol – ulttyń rýhanı ózegi. Sondyqtan qazirgi kezeńde qyz balanyń boıynda jaýapkershilik, mádenıet, parasat pen ulttyq tárbıe qatar qalyptasýy qajet. Babalarymyz ustanǵan qyz tárbıesiniń negizi búgin de óz ózektiligin joǵaltqan joq, – degen mazmunda oı bólisti.
Semınardyń negizgi spıkeri – fızıolog, bıolog, nýtrısolog, «Senimen Bolashaq» RQB-nyń ekspert-janashyry Erkejan Maratqyzy qyz balalarǵa densaýlyq mádenıeti, durys tamaqtaný, jeke bas gıgıenasy jáne erte júktiliktiń aldyn alý taqyryptarynda jan-jaqty aqparat berdi. Sonymen qatar ol jasóspirim kezeńindegi fızıologıalyq jáne psıhologıalyq erekshelikterdi túsindirip, reprodýktıvti densaýlyqty saqtaý joldaryn naqty mysaldarmen baıandady.
Qatysýshylar mamanǵa ózderin tolǵandyrǵan suraqtaryn qoıyp, ómirlik mańyzy bar paıdaly keńester aldy. Jasóspirimder úshin mundaı ashyq ári shynaıy áńgime olardyń dúnıetanymyn keńeıtip, jaýapkershilik sezimin arttyra tústi.
9 «á» synyp oqýshysy Inabat Áljıgıtova óz áserimen bólisti:
– Qazirgi tańda aqparat óte kóp. Qaısysy durys, qaısysy burys ekenin ajyratý qıyn. Tipti kúndelikti turmysta qoldanylatyn zattardyń da paıdasy men zıany týraly bile bermeımiz. Bul semınarda bári ashyq aıtylyp, maǵan óte paıdaly aqparat berildi. Kóp nárseni túsinip aldym, – dedi ol.
Shara sońynda mektep ujymy men qatysýshylar qyz tárbıesine arnalǵan mundaı mazmundy kezdesýlerdiń mańyzy zor ekenin atap ótti. №141 JBBM dırektory Ǵazıza Qaraǵulqyzy basqaratyn oqý ornynda ótken bul is-shara qyz balalardyń tárbıesine baǵyttalǵan júıeli jumystardyń bir bóligi retinde joǵary deńgeıde uıymdastyryldy.
Osylaısha, «Senimen Bolashaq» RQB júzege asyryp otyrǵan mundaı semınar-trenıngter jas urpaqtyń sanaly, deni saý, ulttyq qundylyqty boıyna sińirgen tulǵa bolyp qalyptasýyna yqpal etip keledi. Bul – tek bilim berý emes, tutas ulttyń rýhanı saýlyǵyna qosylǵan mańyzdy úles.
Bıfat ELTAEVA
