Qazaqstanda Telegram messendjeri arqyly taralatyn onlaın alaıaqtyqtyń jańa túri tirkeldi. Bas prokýratýra azamattardy “tegin elektrondy kitaptar” týraly jarnamalarǵa senbeýge shaqyrdy.

Qadaǵalaýshy organnyń habarlaýynsha, alaıaqtar ınternet qoldanýshylaryn tegin elektrondy kitaptar qory bar degen syltaýmen aldap júr. Arnaıy bottar belgili bir kitaptardy usynyp, olardyń qysqasha sıpattamasyn kórsetedi. Alaıda tolyq nusqasyn júkteý úshin usynylatyn faıl — kitap emes, zıandy qosymsha bolyp shyǵady.

Mundaı qosymshany smartfonǵa ornatý jeke derekterdiń qaýipsizdigine tikeleı qaýip tóndiredi. Atap aıtqanda, qupıa sózder men bank derekteri urlanýy, jeke hat-habarlar men fotosýretterge qol jetkizilýi, sondaı-aq qurylǵyny qashyqtan tolyq basqarý múmkindigi paıda bolýy yqtımal.

Bas prokýratýra belgisiz jáne kúmándi kózderden alynǵan faıldar men qosymshalardy ornatýdyń qaýipti ekenin eske saldy. Azamattarǵa kúdikti siltemelerdi ashpaýǵa, messendjerler arqyly taralǵan baǵdarlamalardy júktemeýge jáne kıbergıgıenanyń negizgi talaptaryn qatań saqtaýǵa keńes berildi.

Mamandardyń aıtýynsha, onlaın qaýipsizdik erejelerin saqtaý — alaıaqtyqtan qorǵanýdyń basty joly.