Almaty oblysy men «Kitap oqıtyn ult – Chıtaıýshaıa nasıa» qoǵamdyq qory arasynda yntymaqtastyq týraly memorandýmǵa qol qoıyldy. Bul kelisim Memleket basshysynyń «Kitap oqý mádenıetin damytý jáne zerdeli ult qalyptastyrý jónindegi sharalar týraly» Jarlyǵy aıasynda iske asyrylýda. Joba boıynsha óńirdegi kitaphanalar, mádenıet jáne bilim berý uıymdary arqyly birlesken jobalar men is-sharalardy uıymdastyrý, jastardyń ıntellektýaldyq jáne rýhanı damýyna yqpal etetin bastamalardy júzege asyrý josparlanyp otyr, – dep habarlaıdy Almaty oblysy ákiminiń baspasóz qyzmeti.
«Kitap oqıtyn ult – Chıtaıýshaıa nasıa» qoǵamdyq qory byltyr shilde aıynda qurylyp, jumysyn bastaǵan. Ótken jyly Qaraǵandy, Qostanaı oblystary men Shymkent qalasynda alǵashqy aǵartýshylyq jobalaryn júzege asyrdy. Nátıjesinde 190 myńǵa jýyq adam kitap oqý daǵdysyn qalyptastyrǵan. Bıyl olardyń sanyn 1,5-2 mln-ǵa arttyrý kózdelýde. Al Almaty oblysynda 100 myńnan asa adamdy qamtý josparlanǵan.
Sharaǵa qatysqan oblys ákimi Marat Sultanǵazıev el Prezıdenti Qasym-Jomart Toqaevtyń kitap oqý mádenıeti men kitaphana isin damytý máselesine erekshe mán berip otyrǵanyn atap ótti. Aımaq basshysynyń aıtýynsha, búginde oblysta 145 kitaphana jumys isteıdi. Olar 71 myńnan astam oqyrmanǵa qyzmet kórsetýde. Jalpy kitap qory 2,7 mln-nan asady. Kitaphanalar janynda kovorkıng ortalyqtary, klýbtar men úıirmeler jumys istep, jastardyń shyǵarmashylyq jáne zıatkerlik damýyna jaǵdaı jasalýda.
«Bıyl Uıǵyr aýdandyq kitaphanasy, Qarasaı aýdanyndaǵy Jandosov aýyldyq kitaphanasy jáne Eńbekshiqazaq aýdanyndaǵy Shelek aýyldyq kitaphanasy jańǵyrtylyp, paıdalanýǵa berildi. Aldaǵy ýaqytta taǵy eki kitaphanany jańartý josparlanǵan.
2023 jyldan bastap barlyq aýdandyq kitaphanalar SAB IRBIS-64+ baǵdarlamasyna kóshirildi. Búgingi tańda elektrondyq katalogqa jáne elektrondyq kitaphana qoryna 1,9 mln-nan astam bıblıografıalyq jazba engizildi. Sondaı-aq KazNEB platformasyna 1 943 kitaptyń sıfrlyq nusqasy joldandy. Oblys boıynsha qoǵamdyq oryndarǵa 786 KazNEB QR-kody ornalastyrylyp, 82 myńnan astam elektrondyq kitapty paıdalaný múmkindigi jasaldy», – dedi Marat Eleýsizuly.
Jıyn barysynda atalǵan qoǵamdyq qordyń tóraǵasy Baqytjan Turlybekov jobanyń maqsaty men atqarylǵan jumystary jaıly baıandady.
«Kitaphana kitap saqtaıtyn oryn emes, bul – adamdar bilim alyp, tanym-túsinigin tereńdetetin rýhanı orda. Osy maqsatta júzege asyrylyp jatqan joba aıasynda kitaphanalarǵa oqyrmandardy tartý jáne kitap oqý mádenıetin qalyptastyrýǵa erekshe kóńil bólinýde. Bizdiń basty maqsattarymyzdyń biri – kitaphanalardy oqyrmanǵa toltyrý. Jumys barysynda halyqtyń kitap oqýǵa yqylasy joǵary ekenin baıqadyq. Áýelde ár aımaqtan 25-30 myń adam qatysady dep oılaǵanbyz. Biraq nátıje biz oılaǵannan da jaqsy boldy. Jobaǵa 190 myńǵa jýyq adam qatyssa, onyń 104 myńnan astamy usynylǵan 15 kitapty tolyq oqyp bitirgen. Bul test nátıjesinde belgili boldy.
Biz 7 baǵyt boıynsha jumys isteımiz. Soǵan sáıkes mektep oqýshylaryn, kolej ben ýnıversıtet stýdentterin, sondaı-aq pedagogterdi, jeke áýletterdi, memlekettik qyzmetshiler men sportshylardy kitap oqýǵa baýlımyz. Máselen, mektep oqýshylary jas erekshelikterine qaraı 5 topqa bólingen. Ár topqa oqýy tıis 15 kitaptan usynylǵan. Dál osylaı orys synyptaryna da bólek tizim jasalǵan. Onyń ishinde beseýi qazaqstandyq avtorlardyń shyǵarmalary, beseýi Batys, al qalǵan beseýi Shyǵys avtorlarynyń kitaptary. Bul synı oılaýdy qalyptastyrýda óte mańyzdy. Iaǵnı mektep oqýshylaryna arnalǵan baǵyttyń ózinde ǵana 150 kitaptyń tizimi bekitilgen», – deıdi Baqytjan Turlybekov.
Shara qorytyndysynda eki jaqty memorandýmǵa qol qoıylyp, qos tarap birlesip jumys isteýge ýaǵdalasty. Osyǵan oraı Marat Eleýsizuly oblystyq mádenıet, arhıvter jáne qujattama, ishki saıasat, bilim jáne jastar saıasaty basqarmalaryna arnaıy mindetter júktedi. Óńirde kitap oqý mádenıetin damytý, halyqtyń, ásirese balalar men jastardyń kitapqa degen qyzyǵýshylyǵyn arttyrý, oqyrman qaýymdastyǵyn qalyptastyrý jáne birlesken mádenı-aǵartýshylyq jobalardy júzege asyrýda qarqyndy jumys isteý keregin basa aıtty.
Qoǵamdaǵy keseldiń kóbi rýhanı toqyraýdan bolady. Al adamdy kemeldik pen tereń paıymǵa jeteleıtin basty qural – kitap. Sondyqtan atalǵan bastama shyǵarma oqýmen ǵana shektelmeıdi. Bul qoǵamdaǵy ózekti máselelerdi sheshýge yqpal etetin mańyzdy joba bolmaq.
