13 maýsym kúni Astanadaǵy Inklúzıvti sport ortalyǵynda Prime Green Clinic uıymdastyrǵan «Baqytty bala» qaıyrymdylyq aksıasy ótti. Igi bastama aıasynda klınıka mamandary 4 pen 18 jas aralyǵyndaǵy balalarǵa tegin profılaktıkalyq medısınalyq tekserý (chek-ap) júrgizdi.

Jas sportshylardy balalar endokrınology, pedıatr, balalar nevrology, balalar kardıology, travmatolog-ortoped jáne meıirgerler qarady. Aksıanyń basty maqsaty – ınklúzıvti sportpen aınalysatyn balalardy qoldaý jáne turaqty profılaktıkalyq tekserýler mádenıetin nasıhattaý.

Ata-analardyń aıtýynsha, mundaı bastamalar erekshe qajettilikteri bar balalardy tárbıelep otyrǵan otbasylar úshin asa mańyzdy.

«Ulymnyń aty – Sanjar, jasy 4-te, oǵan aýtızm dıagnozy qoıylǵan. Bizdiń balalar úshin mundaı tekserýler óte mańyzdy, sebebi olar jylyna keminde eki ret osyndaı chek-aptan ótýi kerek. Búgin tekserýden tegin ótý múmkindigine ıe bolǵanymyzǵa óte qýanyshtymyz. Qazir bir mamannyń qabyldaýy 10-15 myń teńge turady. Sondyqtan osyndaı qaıyrymdylyq bastama kóterip, balalarymyzǵa erekshe kóńil bólgeni úshin klınıkaǵa shyn júrekten alǵysymyzdy bildiremiz. Bizge ortopedtiń keńesi qajet edi, osy chek-ap aıasynda tekserýden óte alǵanymyzǵa qýanyshtymyz», – deıdi Sanjardyń anasy Aqsulý Sattarova.

Dárigerlerdiń aıtýynsha, turaqty profılaktıkalyq tekserýler densaýlyqtaǵy ózgeristerdi erte kezeńde anyqtap, aýyr aýrýlardyń aldyn alýǵa múmkindik beredi.

«Osyndaı profılaktıkalyq chek-aptar densaýlyqtaǵy máselelerdi erte anyqtaýǵa kómektesedi. Qaralýǵa kelgen balalardyń arasynda sal aýrýyna shaldyqqan balalar ǵana emes, damý erekshelikteri bar basqa da balalar kezdesedi. Tekserý barysynda biz jıi ata-analar buryn baıqamaǵan dene qalpynyń buzylystaryn, tirek-qımyl apparatynyń deformasıalaryn anyqtaımyz. Sondaı-aq skolıozdyń bastapqy belgilerin, jalpaqtabandylyqty jáne qosymsha tekserý men baqylaýdy qajet etetin basqa da jaǵdaılardy baıqaımyz. Erte dıagnostıka der kezinde túzetý jumystaryn bastap, buzylystardyń odan ári asqynýynyń aldyn alýǵa múmkindik beredi», – deıdi travmatolog-ortoped dáriger Merýert Saǵynǵazy.

«Baqytty bala» aksıasy balalarǵa profılaktıkalyq medısınalyq kómektiń qoljetimdiligin arttyrýǵa jáne ınklúzıvti sportty damytýǵa qoldaý kórsetýge baǵyttalǵan.

Uıymdastyrýshylardyń aıtýynsha, balanyń densaýlyǵyna qamqorlyq turaqty profılaktıkalyq tekserýlerden bastalady. Mundaı tekserýler yqtımal qaýipterdi der kezinde anyqtap, balalardyń ómir sapasyn saqtaýǵa kómektesedi.

«Salaýatty bolashaq – búgingi qamqorlyqtan bastalady». Dárigerlerdi, ata-analardy jáne jas sportshylardy biriktirgen qaıyrymdylyq jobasynyń negizine dál osy ıdeıa alyndy. Barlyǵynyń maqsaty bir – ósip kele jatqan urpaqtyń densaýlyǵy