QR Eńbek jáne halyqty áleýmettik qorǵaý mınıstrligi Memlekettik áleýmettik saqtandyrý qorynan (MÁSQ) tólenetin keıbir áleýmettik tólemderge qatysty sheshim qabyldaý prosesterin — taǵaıyndaý, bas tartý, qaıta esepteý, toqtata turý jáne toqtatý — avtomattandyrý boıynsha pılottyq jobany iske qosýdy kózdep otyr.

Mınıstrliktiń túsindirýinshe, bul bastama memlekettik qyzmet kórsetý merzimderin qysqartýǵa baǵyttalǵan. Joba aıasynda MÁSQ fılıaldarynyń qyzmetkerleri sheshim qabyldaý prosesinen shettetilip, tólemderdi alýshylardyń shotyna qarajatty jyldamyraq aýdarýǵa, sondaı-aq áleýmettik tólemderdi ýaqtyly toqtata turý men toqtatýdy qamtamasyz etýge múmkindik beredi.

Pılottyq rejımde tek mynadaı arnalar arqyly kelip túsken elektrondy ótinishter qaralatyn bolady:

• «Elektrondyq úkimet» portaly,

• «Elektrondyq eńbek bırjasy» portaly,

• Ekinshi deńgeıli bankter arqyly joldanǵan ótinishter,

• Proaktıvti formattaǵy qyzmetter.

Atalǵan ótinishter aldyn ala kelisilgen jáne belgili bir krıterıılerge saı bolýy tıis. Naqtyraq aıtqanda:

• áleýmettik aýdarymdar tek bir tóleýshiden túsýi tıis (JK, sharýa qojalyǵy basshysy nemese jeke praktıkamen aınalysatyn tulǵalardan basqa);

• áleýmettik aýdarymdar ýaqtyly tólenýi qajet (esep beriletin aıdan keıingi ekinshi aıdyń 5-kúninen keshiktirmeı);

• qyzmetkerdiń áleýmettik aýdarymdary kórsetilgen tabysymen sáıkes bolýy shart;

• qajetti málimetterdi alý úshin sıfrlandyrylǵan qujattardyń tolyq toptamasy bolýy tıis.

Mınıstrlik bul krıterııler avtomattandyrýdyń tıimdiligin baǵalap, bıznes-prosesterdi ońtaılandyrýǵa múmkindik beredi dep esepteıdi.

Pılottyq jobanyń naqty bastalý kúni týraly qosymsha habarlanatyn bolady.

Qujat 2025 jylǵy 27 maýsymǵa deıin qoǵamdyq talqylaý úshin «Ashyq NQA» portalynda jarıalanǵan.