Almaty qalasy Naýryzbaı aýdandyq soty aqyn Muqaǵalı Maqataevqa til tıgizgen bloger Álisher Temenovke qatysty qylmystyq isti toqtatty. Bul sheshim jábirlenýshi — aqynnyń uly Juldyz Maqataevtyń keshirim berýine baılanysty qabyldandy. İsti sýdıa Beınegúl Kaısına qarady.
Temenov QR Qylmystyq kodeksiniń 131-baby 2-bóligi (Qorlaý) boıynsha aıyptalǵan bolatyn. Sot otyrysy 16 maýsym kúni ótti. Onda Juldyz Maqataev aıyptalýshyny keshirgenin aıtyp, isti toqtatýdy surady. Buǵan deıin ol moraldyq shyǵyn retinde 10 mıllıon teńge talap etken edi.
Aıyptalýshy óz kinásin tolyq moıyndap, keshirim surady. Ol jábirlenýshimen kelisimge kelgenin, qazirgi ýaqytta kóliginde 2 mıllıon teńge bar ekenin aıtyp, qalǵan 1 mıllıon teńgeni on kún ishinde tóleıtinin jetkizdi. Ýaqytsha kepil retinde kóliginiń kiltin qaldyrdy.
Sýdıa taraptardyń tatýlasýyna baılanysty isti toqtatyp, Temenovti qylmystyq jaýapkershilikten bosatty. Sonymen qatar azamattyq talaptyń kúshi joıyldy. Alaıda sot sheshimi zańdy kúshine engenge deıin blogerge elden shyqpaý jáne tıisti minez-qulyq saqtaý týraly mindetteme saqtalady.
Temenov buǵan qosa Muqaǵalı Maqataevqa til tıgizgeni úshin halyqtan keshirim surap, arnaıy vıdeo jarıalaýǵa ýáde berdi.
Aıta keteıik, 2024 jyldyń 8 qazanynda Álisher Temenov áleýmettik jelige Muqaǵalı Maqataevty balaǵattap, beıádep sózder aıtylǵan vıdeosyn jarıalaǵan bolatyn.
