Búgin QR Parlamenti Senatynyń jalpy otyrysynda Joǵarǵy sot sýdıalary German Nurbaev pen Dosjan Ámirov qyzmetterinen bosatyldy.

Otyrysta Joǵary sot keńesiniń tóraǵasy Dmıtrıı Malahov Memleket basshysynyń atalǵan sýdıalardy qyzmetten bosatý týraly usynysyn Senattyń qaraýyna engizdi.

– Memleket basshysynyń usynysyna sáıkes, Joǵarǵy sot sýdıasy Dosjan Ámirov zeınet jasyna jetýine baılanysty otstavkaǵa ketip otyr. Ol buǵan deıin birneshe oblystyq sottarǵa tóraǵalyq etken, sýdıalar qaýymynda zor bedelge ıe, sondaı-aq Qazaqstan sýdıalar odaǵynyń tóraǵasy bolyp tabylady, – dedi Malahov.

Sondaı-aq ol Joǵarǵy sottyń taǵy bir sýdıasy German Nurbaevtyń jańa laýazymǵa taǵaıyndalǵanyn habarlady.

– TMD Ekonomıkalyq sotynyń 2025 jylǵy 10 maýsymdaǵy Pleným qaýlysymen German Karımuly Nurbaev TMD Ekonomıkalyq sotynyń tóraǵasy bolyp saılandy, – dedi ol.

Senat depýtattary usynysty biraýyzdan qoldap, sýdıalardy qyzmetinen bosatý týraly sheshimdi maquldady.