«BizBirgemiz Qazaqstan» qorynyń jetekshisi Perızat Qaırattyń sot prosesi tikeleı efırde ótýi múmkin. Bul týraly Joǵarǵy sot QazAqparat agenttiginiń resmı suranysyna bergen jaýabynda málimdedi.

«Eger Perızat Qaırattyń isi sotqa kelip túsip, qoǵam men zańgerler tarapynan tıisti suranys bolsa, sot otyrystaryn tikeleı efırde kórsetý máselesi qaralýy múmkin», — delingen Joǵarǵy sottyń jaýabynda.

Aıta keteıik, Perızat Qaırat pen onyń anasy Ǵaını Alashbaevaǵa qatysty qylmystyq is boıynsha tergeý aıaqtalyp, is aıyptaý aktisimen birge Bas prokýratýraǵa joldandy.

Tergeý derekterine sáıkes, Perızat Qaırat memleketke 3,5 mlrd teńge kóleminde materıaldyq zalal keltirgen. Sondaı-aq, urlanǵan qarjyǵa satyp alynǵan quny 865 mln teńgege baǵalanǵan múlikke tyıym salynǵan.