Qazaqstannyń Qatar Memleketindegi elshiligi sol elde ýaqytsha júrgen azamattarǵa resmı túrde úndeý jarıalady. Qazirgi ahýalǵa baılanysty jasalǵan málimdemede, Qatar aýmaǵynda beıbit turǵyndarǵa tikeleı qaýip tónip turmaǵany atap ótilgen.
«Azamattardan sabyr saqtap, tynysh ári qaýipsiz jerlerde bolýdy, sondaı-aq qaýipsizdik talaptaryn qatań ustanýdy suraımyz», – dep habarlady dıplomatıalyq ókildik.
Sondaı-aq elshilik Qatarda áýe qatynasynyń ýaqytsha toqtatylǵanyn eske saldy. Áýe keńistigi ashylǵannan keıin, týrıserdiń elge oralýy boıynsha naqty málimetter otandyq týroperatorlar arqyly beriletin bolady. Qazirgi tańda osy baǵytta uıymdastyrý sharalary atqarylýda.
Qazaqstan dıplomattary jaǵdaıdy turaqty baqylaýda ustap otyr. Qajet bolǵan jaǵdaıda Qatar jáne Qazaqstan tarapynan jaýapty organdarmen birlesip, azamattardyń qaýipsizdigin qamtamasyz etýge baǵyttalǵan qosymsha áreketter qolǵa alynatyny aıtyldy.
«Jaǵdaı turaqtalǵansha úıden shyqpaı, barynsha qaýipsiz jerlerde bolýlaryńyzdy ótinemiz», – delingen elshilik taratqan habarlamada.
Sonymen qatar tótenshe jaǵdaı kezinde habarlasýǵa arnalǵan baılanys nómirleri de jarıalandy:
📞 +974 4411 0527
📞 +974 4412 8015
📞 +974 5064 9955
Aıta ketsek, 23 maýsym kúni Iran AQSH-tyń Qatar men Irak aýmaǵyndaǵy birqatar áskerı nysandaryna soqqy jasaǵan bolatyn. Osydan keıin Qatar bıligi Tegerannyń áreketin aıyptaıtynyn resmı túrde málimdedi.
