Jambyl oblysynyń turǵyny bank qosymshasyndaǵy «Memlekettik qyzmetter» bólimin ashyp, 1991 jyly óz atyna neke tirkelgenin kórip, eseńgirep qaldy. Jarty ǵasyrǵa jýyq «úılenip júrgenin» sol sátte bilgen ol jazbany joıý úshin sotqa júgindi.

Qysqa tanystyq, uzaq «neke»

İstiń mán-jaıyn sot materıaldary ashyp berdi. Er adam 1991 jyly qyzben tórt aı ǵana kezdesip, keıin aıyrylysyp ketken. AHAT bólimine baryp, neke tirketpegen, eshqandaı qujatqa qol qoımaǵan.

Odan keıin árkim óz jolymen ketken: qyz 1994 jyly basqa azamatpen resmı nekege turǵan, al er adam 2021 jyly otbasyn qurǵan.

Alaıda 2025 jyly bank qosymshasynan 1991 jylǵy neke týraly derek shyqqanyn kórip, azamat tirkeýdi joıýdy surap, sotqa aryz bergen.

Sot ne anyqtady

Sot akt jazbasyndaǵy qoltańbalardy tekserip, olardyń nı er adamdiki, nı áıeldiki emes ekenin anyqtady. Qoltańbalardy úshinshi tulǵa qoıǵany belgili boldy.

Sol jylǵy azamattyq hal aktileriniń túpnusqa kitabyn arhıvtik saqtaý merzimi ótip, joıyp jibergeni anyqtaldy. Degenmen istegi kóshirmeler men ózge dálelder jetkilikti dep baǵalandy.

Er adamnyń jaqyn dosy men kórshisi kýá retinde tyńdalyp, eshqandaı tirkeýge birge barmaǵanyn jáne qujatqa qol qoımaǵanyn rastady. İske úshinshi tulǵa retinde tartylǵan AHAT ókili sot otyrysyna kelmedi.

Sheshim qandaı shyqty

Sot 1991 jylǵy neke tirkeýin zań talaptary óreskel buzylyp júrgizilgen dep tanydy: taraptar tirkeýge jeke qatyspaǵan, al mundaı «qashyqtan neke» zańda joq. Sonyń negizinde akt jazbasyn jaramsyz dep tanydy.

Oqıǵa azamattyq hal aktilerin júrgizýde jáne derekqorlardy sıfrlandyrýda qaýipsizdik pen tekserý rásimderin kúsheıtý qajettigin aıqyn kórsetti.

Bul týraly Qamshy.kz aqparat agenttigi habarlaıdy.