AQSH prezıdenti Donald Tramp osy aptada Shveısarıanyń Davos qalasynda ótetin halyqaralyq forýmda eýropalyq kóshbasshylarǵa «Grenlandıa bizge kerek» dep ashyq aıtatynyn málimdedi. Bul málimdeme Eýropa men AQSH arasyndaǵy saıası shıelenisti kúsheıte tústi.

Tramp áleýmettik jelide Fransıa prezıdenti Emmanýel Makronnan kelgen habarlamany jarıalady. Onda Makron: «Grenlandıa boıynsha ne istep jatqanyńyzdy túsinbeımin» dep jazǵan. Sondaı-aq AQSH prezıdenti NATO bas hatshysynan kelgen habarlamany bólisip, ózin Grenlandıaǵa AQSH týyn qadap turǵan kúıde beıneleıtin jasandy sýretterdi jarıalady.

Senbi kúni Tramp Grenlandıaǵa qatysty kelisimge qol jetkizilmese, Ulybrıtanıa men Danıany qosa alǵanda segiz eýropalyq odaqtas elge 10% kedendik tarıf engizemin dep qorqytty. Bul málimdeme Eýropa elderiniń qatań synyna ushyrady.

Grenlandıanyń premer-mınıstri «bizge qysym kórsetýge jol bermeımiz» dep málimdedi. Al Eýropanyń birqatar elderi Danıaǵa qoldaý bildirip, Grenlandıanyń jartylaı avtonomıalyq mártebesin qorǵaýǵa daıyn ekenin aıtty.

Sonymen qatar Donald Tramp Ulybrıtanıanyń Chagos araldaryn Mavrıkııge berý josparyn «ÓTE AQMAQTYQ» dep atap, Londonnyń bul sheshimin qatań synǵa aldy.

Oǵan qosa, Tramp Fransıa prezıdenti Emmanýel Makronnyń AQSH usynǵan «Beıbitshilik keńesi» (Board of Peace) quramyndaǵy oryndy qabyldaýdan bas tartqany týraly aqparattardan keıin, fransýz sharaptaryna 200% kóleminde baj salyǵyn engizemin dep qoqan-loqy jasady.