Qazaqstan halqy 15 naýryzda jańa Konstıtýsıaǵa referendým arqyly daýys beredi. Osyndaı tarıhı betburys tusynda Abaı ýnıversıtetinde Qazaqstan Konstıtýsıasy men zań salasyna zor eńbek sińirgen Salyq Zımanovtyń 105 jyldyǵyna arnalǵan «Zımanov ensıklopedıasynyń» tusaýy kesildi.Basylym jańa Konstıtýsıa men buǵan deıingi Ata Zańdardyń arasyndaǵy tarıhı sabaqtastyq úshin óte mańyzdy. Oǵan tanymal akademık-ǵalymdar men zańgerler jáne ǵylymı qaýymdastyq músheleri qatysty.
Qazaqstanda quqyqtyq memleket qaǵıdattaryn jańǵyrtý, konstıtýsıalyq reformalardy jetildirý máselesi ózektiligin joǵaltqan emes. Memleket turaqtylyǵynyń basty kepili sanalatyn Konstıtýsıanyń tarıhı negizderin zerdeleý, ony qalyptastyrýǵa úles qosqan tulǵalardyń ǵylymı murasyn jańasha baǵalaý – búgingi kúnniń mańyzdy mindetteriniń biri. Elimizdiń tuńǵysh jáne qoldanystaǵy Konstıtýsıasyn qalyptastyrýda zor úles qosqan QR UǴA akademıgi, zań ǵylymynyń zańǵar tulǵasy Salyq Zımanovtyń 105 jyldyǵyna oraı uıymdastyrylǵan bul jıyn «Jańa Konstıtýsıa – memleket turaqtylyǵynyń kepili» atty taqyryp aıasynda órbidi. Basqosýdyýnıversıtettiń Zertteý qyzmet jáne ınovasıajónindegi prorektory Ertaı Sultan ashyp, Salyq Zımanovtyń quqyqtyq ǵylymdaǵy orny men Konstıtýsıa damýyna qosqan úlesin erekshe atap ótti.
– Salyq Zımanov keńestik kezeńde otandyq zań ǵylymynyń negizin qalaýshylardyń biri retinde elge belgili bolsa, táýelsizdiktiń alǵashqy syndarly jyldarynda ǵylymı mol tájirıbesin ulttyq memlekettiń irgetasyn bekitýge jumsady. Ol elimizdiń zańnamalyq negizin qalyptastyrýǵa baǵyttalǵan birneshe konstıtýsıalyq aktilerdiń ázirlenýine tikeleı atsalysty. Konstıtýsıa týraly qujattyń ómirge joldama alýyna zor eńbek sińirdi, – dedi prorektor.
İs-shara barysynda «Zımanov ensıklopedıasy» basylymynyń tusaýy saltanaty túrde kesilip, elimizdiń bir top zańger-ǵalymdary Salyq Zımanovtyń 100 jyldyǵyna arnaıy shyǵarylǵan mereıtoılyq tósbelgisimen marapattaldy. Salyq Zımanov ensıklopedıasy – Qazaqstandaǵy quqyqtyq ǵylymnyń jáne konstıtýsıalyq damýǵaólsheýsiz úles qosqan S.Zımanovtyń ómiri men qyzmetin, ǵylymı eńbekterin, qoǵamdyq jáne memlekettik qyzmettegi rólin jan-jaqty qamtıtyn biregeı basylym. Ensıklopedıa Qazaqstandaǵy Konstıtýsıany qalyptastyrýdyń dástúrin kórsete otyra, elimizde qabyldanatyn Jańa Konstıtýsıa jobasynyń tarıhı sabaqtastyǵyn aıqyndaýǵa múmkindik beredi.
QR Parlamenti Májilisiniń depýtaty Aıgúl Quspan, QR UǴA akademıgi Murat Jurynov, Qazaqstan Jazýshylar odaǵynyń tóraǵasy Mereke Qulkenov, Qazaqstan ǵalymdar qaýymdastyǵynyń tóraǵasy Orazaly Sábden bastaǵan belgili tulǵalar sóz sóılep, Qazaqstan konstıtýsıalyq quqyq ǵylymy men Salyq Zımanov týraly pikir bildirdi.Salyq Zımanovtyń ǵylymı mektebi, shákirtteri men quqyqtyq memleket qalyptastyrýǵa qosqan úlesi týraly oı bólisip, basylymnyń ǵylymı ári tarıhı mańyzyna erekshe toqtaldy.
Ǵalymdardyń pikirinshe, ensıklopedıada kóterilgen ıdeıalar referendým arqyly qabyldanbaq jańa Konstıtýsıa qaǵıdattarymen úndesip, onyń quqyqtyq sabaqtastyǵy mańyzdylyǵyn aıqyndaı túspek.
«Abai University» medıa ortalyǵy
