Búgin Abaı ýnıversıtetinde «Ǵylymdaǵy sıfrlyq serpilis: jasandy ıntellekt dáýiri» taqyryby aıasynda ótken Ǵylym dekadasynyńsaltanatty jabylý rásimi ótti. Ǵylym qyzmetkerleri kúnine oraılastyrylǵan aýqymdy ǵylymı is-sharada onkúndik qorytyndysy shyǵarylyp, aldaǵy damý baǵyttar aıqyndaldy. Jıyn barysynda ǵylym men bilim salasyna úles qosqan ýnıversıtet qyzmetkerlerine QR ǴjJB mınıstrligi tarapynan marapattar tabys etildi.
Abaı atyndaǵy QazUPÝ-da 1-10 sáýir aralyǵynda ótken Ǵylym dekadasy barysynda 150-den astam is-shara uıymdastyrylǵan. Olardyń qatarynda halyqaralyq ǵylymı konferensıalar, ınovasıalyq jobalar men startaptar kórmesi, robototehnıka jarystary, ǵylymı semınarlar, pándik olımpıadalar, sondaı-aq otandyq jetekshi jáne sheteldik ǵalymdardyń qatysýymen ótken kezdesýler bar.
Onkúndik sheńberinde sıfrlyq tehnologıalar men jasandy ıntellekt baǵytyndaǵy ózekti máseleler qarastyrylyp, ǵylym men bilim berý úderisteriniń jańa tásilderi talqylandy. İs-sharalar jas zertteýshilerdiń ǵylymı áleýetin damytýǵa jáne olardyń zertteý mádenıetin qalyptastyrýǵa baǵdarlandy. Onymen qosa, Ǵylym dekadasyna Qazaqstannyń barlyq óńirlerinen kelgen mektep oqýshylary qatysyp, óz ǵylymı jobalaryn tanystyrdy. Bul bastama jas býynnyń ǵylymǵa qyzyǵýshylyǵyn arttyryp, olardyń kásibı baǵdaryn aıqyndaýǵa yqpal etti.
Saltanatty jabylý rásiminde ýnıversıtettiń Basqarma Tóraǵasy-Rektor Bolat Tilep sóz sóılep, Ǵylym dekadasynyń mazmundyq deńgeıine joǵary baǵa berdi. Rektor óz sózinde onkúndik aıasynda ǵylym men bilimniń, ınovasıa men shyǵarmashylyqtyń ózara baılanysyn aıqyndaıtyn keshendi jumystar júzege asyrylǵanyn alǵa tartty.
– Búgin biz bárimiz úshin mańyzy zor, mazmuny baı, taǵylymy tereń onkúndiktiń qorytyndysynda bas qosyp otyrmyz. Dekada barysy tek is-sharalar jıyntyǵymen shektelmeı, bolashaq ǵylymnyń irgetasyn qalaýǵa baǵyttalǵan júıeli jumysty usyndy. Onkúndik aıasynda mektep pen joǵary oqý orny arasyndaǵy baılanysty nyǵaıtýǵa kózdelgen ǵylymı jobalar kórmesi, bilim berý alańdary, startaptar men ınovasıalyq bastamalar uıymdastyryldy. Bul – ǵylymǵa bet burǵan jas býynnyń naqty jetistikteri. Bıylǵy dekadanyń basty ereksheligi – sıfrlandyrý men jasandy ıntellekt taqyryptarynyń keńinen qamtylýy. Atalǵan baǵyttarda mazmundy pikir almasýlar júrgizilip, ýnıversıtetimizdiń ýaqyt talabyna saı damyp kele jatqany baıqaldy», – dedi Bolat Anapıauly.
Dekada sheńberinde fılologıa, pedagogıka, psıhologıa, óner, sport jáne jaratylystaný baǵyttaryndaǵy ǵylymı konferensıalar men semınarlar ótkizildi. Sonymen qatar jas ǵalymdar men stýdentterge arnalǵan ǵylymı olımpıadalar, TED talk formatyndaǵy baıqaýlar men ǵylymı-ıntellektýaldyq oıyndar ótkizildi.
Osy ýaqyt aralyǵynda «Research Lab Day» formatyndaǵy zerthanalar tanystyrylymy, ǵylymı kitaphananyń ashyq esik kúnderi jáneTOP-time semınarlarǵa Germanıa, Reseı Federasıasy jáne Qytaı elderinen kelgen ǵalymdar qatysty. Sondaı-aq sarapshylar zamanaýı zertteý ádisteri, sıfrlyq tehnologıalar men jasandy ıntellektti bilim berý jáne ǵylym salasynda qoldaný baǵytynda mazmundy baıandamalar jasalǵan.
Jabylý saltanatynda ǵylymdy damytýǵa eleýli úles qosqan ýnıversıtet oqytýshylary men qyzmetkerleri marapattarmen marapattaldy. Til saıasatyn damytýǵa erekshe úles qosqany jáne tilderdi damytý salasyn jetildirýge belsendi atsalysqany úshin «Ana tilin damytýǵa qosqan úlesi úshin» tósbelgisi berildi. Olardyń qatarynda fılologıa ǵylymdarynyń kandıdaty, Shyǵys fılologıasy jáne aýdarma kafedrasynyń aǵa oqytýshysy Eleonora Kanseıtova men tarıh ǵylymdarynyń kandıdaty, Ejelgi jáne orta ǵasyrdaǵy Qazaqstan tarıhy kafedrasynyń dosenti Bıbigúl Abenova bar.
Sonymen qatar, QR Ǵylym jáne joǵary bilim mınıstrliginiń «Ǵylym úzdigi» qurmet dıplomy, «Qurmet» gramotasy jáne Alǵys haty ýnıversıtet ǵalymdary men oqytýshy-professorlar qaýymyna tabystaldy.
