Qazaqstanda volonterlik qozǵalys qarqyndy damyp keledi. Sońǵy jyldary eriktiler sany aıtarlyqtaı ósip, qoǵam ómiriniń mańyzdy bóligine aınaldy. Osyǵan baılanysty Senat depýtaty Nıkolaı Arsútın bastaǵan halyq qalaýlylary Premer-Mınıstrdiń orynbasary – Mádenıet jáne aqparat mınıstrine joldaǵan depýtattyq saýalynda volonterlik qyzmetti eńbek ótiline esepteý jáne eriktilerdi áleýmettik qorǵaý máselesin kóterdi.
Depýtattyń aıtýynsha, 2020 jyly elimizde shamamen 50 myń volonter bolsa, búginde olardyń sany 300 myń adamǵa jetken. Qazir 800-den astam uıym áleýmettik jobalardy júzege asyryp, ulttyq jáne 20 óńirlik front-ofıs jumys isteıdi. Volonterler ekologıa, bilim, mádenıet, áleýmettik qoldaý jáne tótenshe jaǵdaılardyń saldaryn joıý salalarynda belsendi.
Nıkolaı Arsútın bul máseleniń ózektiligin erekshe atap ótti.
«İs júzinde bul – qoǵam úshin mańyzdy mindetterdi sheshýge úles qosyp júrgen, negizinen jastardan quralǵan úlken azamattar toby. Sondyqtan volonterlik qyzmetti taný men qoldaý memlekettik saıasattyń mańyzdy baǵytyna aınalýy tıis», dedi depýtat.
Soǵan qaramastan, qoldanystaǵy zańnamada volonterlik qyzmet tek qoǵamdyq belsendilik retinde qarastyrylyp keledi. Sonyń saldarynan volonterlik eńbek ótiline engizilmeıdi jáne ol azamattarǵa eńbek nemese saqtandyrý quqyqtaryn bermeıdi. Qazirgi tańda tek volonterlik saǵattardy esepke alý, bilim granttaryna túsý kezinde jeńildikter qarastyrý sıaqty shekteýli tetikter bar.
Taǵy bir mańyzdy másele – volonterlerdiń ómiri men densaýlyǵyn saqtandyrý. Bul baǵytta naqty mindetti talaptar zańda qarastyrylmaǵan. N. Arsútınniń aıtýynsha, bul olqylyq eriktilerdiń qaýipsizdigine tikeleı áser etedi.
«Qazirgi tańda saqtandyrý tek erikti sıpatta júzege asyrylady jáne barlyq jaǵdaıda qoldanylmaıdy. Bul máseleni júıeli túrde sheshý qajet», dedi ol.
Depýtat sondaı-aq Memleket basshysy buǵan deıin volonterlik saǵattardy eńbek ótiline esepteý máselesin kótergenin eske saldy. Alaıda 2024-2026 jyldarǵa arnalǵan jol kartasynda bul baǵytta naqty sharalar tolyq kórinis tappaǵan.
Osyǵan baılanysty depýtattar naqty usynystaryn jetkizdi. Atap aıtqanda, volonterlik saǵattardy eńbek ótiline esepteý boıynsha pılottyq jobany iske qosý usynyldy. Bul bastama, eń aldymen, áleýmettik baǵytta turaqty túrde qyzmet etetin eriktilerge arnalmaq.
«Biz bul tetikti eń aldymen qarttarǵa, múmkindigi shekteýli jandarǵa jáne áleýmettik osal toptarǵa kómektesip júrgen azamattarǵa baǵyttaýdy usynamyz», dedi N. Arsútın.
Sonymen qatar depýtattar volonterlerge qosymsha áleýmettik kepildikter berý, onyń ishinde ómiri men densaýlyǵyn saqtandyrýdy engizý qajettigin kóterdi. Bul usynystar 2030 jylǵa deıingi volonterlikti damytýǵa arnalǵan jańa baǵdarlamalyq qujatta eskerilýi tıis.
Halyqaralyq tájirıbege nazar aýdarǵan depýtattar kóptegen elde volonterlik eńbek ótiline engizilmegenimen, eriktilerdi qoldaýdyń tıimdi tetikteri qalyptasqanyn atap ótti. Máselen, keıbir memleketterde volonterlerdi mindetti saqtandyrý júıesi jumys isteıdi.
Jalpy, halyq qalaýlylarynyń pikirinshe, Qazaqstanda volonterlik qozǵalysty damytý úshin ınstıtýsıonaldyq qoldaýdy kúsheıtý qajet. Bul qoǵamdaǵy azamattyq belsendilikti arttyryp, áleýmettik jaýapkershilikti nyǵaıtýǵa yqpal etedi.
