Qazaqstanda merzimdi áskerı qyzmet ótkerip júrgen azamattarǵa bankter men mıkroqarjy uıymdarynyń nesıe berýine tyıym salý josparlanyp otyr. Bul norma «Ashyq NQA» portalynda jarıalanǵan qaýly jobasynda kózdelgen.

Qujatty Qarjy naryǵyn retteý jáne damytý agenttigi ázirlegen. Jobaǵa sáıkes, Qorǵanys mınıstrligi merzimdi áskerı qyzmetke shaqyrylǵan azamattar týraly aqparatty nesıelik búrolarǵa beretin bolady. Atalǵan málimetter nesıelik esepte belgi retinde kórsetiledi.

Osydan keıin, azamattar nesıe alýǵa ótinim bergen jaǵdaıda, bank nemese mıkroqarjy uıymy aldymen onyń mártebesin tekserýge mindetti. Eger kredıttik esepte ótinim berýshiniń qazirgi ýaqytta merzimdi áskerı qyzmette júrgeni kórsetilse, nesıe berýden bas tartylýy tıis.

Qaýly jobasy 3 aqpanǵa deıin qoǵamdyq talqylaýǵa shyǵarylǵan. Qoǵamdyq talqylaý nátıjesi boıynsha qujatqa ózgerister engizilýi nemese ol bekitilýi múmkin.