Qazaqstanda kıberqylmysqa qarsy is-qımyl departamenti azamattardy onlaın tanysýlar kezinde saq bolýǵa shaqyrdy. İshki ister mınıstrliginiń málimetinshe, áleýmettik jelilerde, ásirese Threads platformasynda ózin jalǵyzbyn dep tanystyryp, «shynaıy qarym-qatynas» izdeıtin akkaýnttardyń artynda alaıaqtar turýy múmkin, dep habarlaıdy Qamshy.kz Polisia.kz-ke silteme jasap.
Vedomstvonyń túsindirýinshe, qaskóıler tartymdy jigit nemese qyz beınesin jasap, hat almasýǵa belsendi túrde kirisedi. Olar tez arada senimge kirip, emosıalyq baılanys ornatýǵa tyrysady. Alaıda biraz ýaqyttan keıin áńgime qarjylyq kómek suraýǵa ulasady. Kóbine alaıaqtyq sqemalar birneshe kezeńnen turady: aldymen jaqyn qarym-qatynas ornatý, keıin qıyn jaǵdaı, aýrý nemese «tıimdi ınvestısıa» týraly áńgime aıtý, sońynda aqsha aýdarýdy suraý.
Polısıa ókilderi eger ınternettegi tanys adam vıdeoqońyraýdan nemese jeke kezdesýden qashqaqtasa, aqsha aýdarýdy talap etse, bógde adamdardyń fotosýretterin paıdalanýy múmkin bolsa, saq bolýǵa keńes beredi. Ásirese sheteldik krıptoámıandarǵa nemese úshinshi tulǵalar arqyly aqsha jiberý usynylsa, bul – alaıaqtyqtyń aıqyn belgisi.
Quqyq qorǵaý organdary qazaqstandyqtarǵa ınternet arqyly tanysqan adamdarǵa aqsha men jeke derekterdi bermeýge, kúmándi siltemelerge ótpeýge, jeke fotosýretterdi jibermeýge jáne profıldegi aqparatty mindetti túrde tekserýge shaqyrdy. Kez kelgen kúmán týyndaǵan jaǵdaıda baılanysýdy dereý toqtatyp, qajet bolsa polısıaǵa júginý usynylady.
