Qazaqstanda ózdiginen qozǵalý múmkindigi shekteýli I toptaǵy múgedektigi bar azamattarǵa jeke kómekshilerdiń qyzmeti kórsetiledi. Bul týraly Eńbek jáne halyqty áleýmettik qorǵaý mınıstrligi habarlady.
Mınıstrliktiń málimetinshe, jeke kómekshiler múgedektigi bar adamdarǵa medısınalyq, áleýmettik jáne ózge de mekemelerge barýǵa, úıden shyǵýǵa, sondaı-aq kúndelikti turmysta qajetti kómekti alýǵa járdemdesedi. Kómekshi abılıtasıa jáne reabılıtasıanyń jeke baǵdarlamasyna sáıkes taǵaıyndalady.
Atalǵan qyzmet jergilikti atqarýshy organdardyń qarajaty esebinen qarjylandyrylady jáne azamatpen zańnamaǵa saı jasalǵan shart negizinde kórsetiledi. Sonymen qatar memleket jeke kómekshiler úshin áleýmettik aýdarymdar júrgizedi, bul kezeń keıin zeınetaqy taǵaıyndaý kezinde eńbek ótili retinde esepke alynady.
Eger I toptaǵy múgedektigi bar azamattyń jeke kómekshisi bolmasa, oǵan turaqty kútim jasaıtyn adamǵa járdemaqy belgilenedi. Bul tólem Áleýmettik kodekske sáıkes aı saıyn respýblıkalyq búdjetten tólenip, kútim kórsetetin otbasylardy qoldaýǵa baǵyttalǵan.
Sondaı-aq 2026 jylǵy 1 qańtardan bastap kúshine enetin ózgeristerge sáıkes, I toptaǵy múgedektigi bar azamattyń jubaıy zeınet jasyna jetken jaǵdaıda da jeke kómekshi bola alady.
Mınıstrlik múgedektigi bar adamdardy qoldaý sharalary aldaǵy ýaqytta da jetildirilip, olardyń qoǵam ómirine belsendi aralasýyna jáne ómir sapasyn arttyrýǵa baǵyttalatynyn atap ótti.
