Keshe, 19 sáýir kúni Qazaqstannyń halyq jazýshysy, kórnekti aqyn ári qoǵam qaıratkeri Muhtar Shahanov 84 jasynda ómirden ótken bolatyn. Búgin áleýmettik jelide aqynnyń jary Hanshaıym Shahanovanyń Muhtar Shahanov hál ústinde jatqanda jazǵan haty taraldy. Marqumnyń jary Halyq jazýshysynyń sońǵy amanaty – ózin Arystan bab kesenesine jerleý bolǵanyn aıtyp edi.

Keıin belgili bolǵandaı, aqyn erteń, 21 sáýir kúni Almatydaǵy Keńsaı zıratyna jerlenedi. Osyǵan baılanysty birqatar qoǵam belsendileri óz pikirin aıtqan.

Mádenıet jáne aqparat mınıstri Aıda Balaeva Azattyq Rýhy redaksıasyna osy máselege qatysty komentarı berdi.

«Aıda Ǵalymǵyzy, qazir áleýmettik jelide Muhtar Shahanovtyń jerlenetin jeri týraly túrli boljam aıtylyp jatyr. Osyǵan baılanysty, naqty aqparat bere alasyz ba?», - dep suradyq mınıstrden.

Suraqqa jaýap bere kele Aıda Balaeva Arystan bab kesenesi qazir týrısik nysan bolǵandyqtan, onyń aýmaǵynan jańa zırattar qazý – adamgershilik turǵysynan da, dinı turǵysynan da durys bolmaıdy degen pikirin aıtty.

«Birinshiden, óz ǵumyryn ult rýhanıatyna arnap, óskeleń urpaqqa mol mura qaldyrǵan aqynymyzdyń týǵan-týystaryna qaıǵyryp kóńil aıtamyn. Suraq jaýabyna kóshsek, sóz joq, elimizde Muhtar Shahanovtaı taý tulǵaǵa máńgilik meken bolýǵa laıyqty jer kóp. Dese de, búgingi elimizdiń muraty – ádiletti qoǵam qurý bolsa, berekesi – sol qoǵamda zań men tártipti saqtaýda. Búginde Arystan bab kesenesi de, ony qorshaǵan eski qorym da memlekettiń qorǵaýyndaǵy nysandar. Iá, buryn zıarat etetin jer bolsa, qazir bul – tarıhı muramyz. Arystan bab panteon-zıraty emes, ol eń aldymen úlken mádenı-rýhanı ortalyq, týrısik baǵytqa engen tarıhı-mádenı nysan. Sondyqtan ol jerge jańa zırattar qazý adamı turǵydan da, dinı turǵydan da durys bolmaıdy dep sanaımyz. Al Muhtar aǵamyzdy tulǵa qylǵan, ortasyn keńeıtip, rýhyn shyńdaǵan qala, zıalylardyń ortasy – Almaty qalasy. Sondyqtan artynan izdep, duǵa jasaıtyn jamaǵat ulylaryn Keńsaıdan tabady. Aqynnyń týystary osy máselege túsinistikpen qaraıdy degen senimdemiz», - dedi Aıda Balaeva.