Qaıǵyly oqıǵa 18 qańtar kúni keshke Soltústik Qazaqstan oblysynyń Qyzyljar aýdanyndaǵy Olshanka aýylynda tirkeldi. Tótenshe jaǵdaılar departamentiniń málimetinshe, órt jeke turǵyn úıde shyqqan.
Aldyn ala derekterge sáıkes, úıde eresekter bolmaǵan. Áleýmettik jelilerde taraǵan aqparatta ata-anasy qonaqqa ketken sátte bala úıde jalǵyz qalǵany aıtylady. Órt sóndirýshiler tilsiz jaýdy sóndirý barysynda bes jasar qyzdyń máıitin tapqan.
Órtti sóndirýge 35 qutqarýshy men 11 birlik arnaıy tehnıka jumyldyryldy. Jalyn qysqa ýaqytta sóndirilgenimen, balany aman alyp qalý múmkin bolmaǵan.
Aldyn ala boljam boıynsha, órttiń shyǵýyna peshti paıdalaný kezinde órt qaýipsizdigi talaptarynyń saqtalmaýy sebep bolýy múmkin. Qazirgi tańda oqıǵanyń barlyq mán-jaıy anyqtalyp jatyr.
Tótenshe jaǵdaılar qyzmeti turǵyndardy qaýipsizdik erejelerin qatań saqtaýǵa, ásirese balalardy qaraýsyz qaldyrmaýǵa shaqyrdy.
