Astanada Memleket basshysy Qasym-Jomart Toqaevtyń qatysýymen parlamenttik reformaǵa arnalǵan jumys tobynyń otyrysy ótti. Jıynda Parlamenttiń quramy men ókilettik merzimi, saılaý tetikteri, zań shyǵarý úderisi jáne bıliktiń ózge tarmaqtarymen ózara is-qımyl máseleleri qaraldy.

Prezıdenttiń aıtýynsha, reformaǵa qatysty qoǵamnan 1,6 myńǵa jýyq usynys túsken. Olardyń qatarynda saıası partıalar, úkimettik emes uıymdar, bıznes ókilderi men sarapshylardyń pikirleri bar. Bul bastamanyń keń qoǵamdyq talqylaýdan ótkenin kórsetedi.

Qasym-Jomart Toqaev sońǵy alty aıda qoǵam reformanyń máni men maqsatyn tereń túsine bastaǵanyn atap ótti. Onyń aıtýynsha, aldaǵy Ulttyq quryltaı otyrysynda ol óz tarapynan naqty usynystaryn jarıalaıdy.

Prezıdenttiń pikirinshe, qolǵa alynǵan ózgerister saıası júıeni jańǵyrtýdy kózdeıdi jáne mazmuny jaǵynan el úshin jańa Konstıtýsıa qabyldaýmen teń. Reforma memlekettik basqarý modelin qaıta qalyptastyrýǵa baǵyttalǵan.