Qańtardan bastap resmı jumys isteıtin azamattardyń aılyq tabysy shamamen 7 500 teńgege artýy múmkin. Bul salyqtyq shegerimderge engizilgen jańa ózgeristerdiń nátıjesi.

Buryn jalaqynyń 55 myń teńgege deıingi bóligi salyqtan bosatylsa, endi bul shek 130 myń teńgege deıin kóterildi. Salyqtan bosatylatyn soma 75 myń teńgege ulǵaıyp, onyń 10 paıyzy — 7 500 teńge qyzmetkerdiń óz tabysyna qosylady.

Qarjy sarapshylary atap ótkendeı, jalaqydan ustalǵan salyq jumys berýshiniń emes, qyzmetkerdiń jeke salyǵy bolyp tabylady. Jumys berýshi tek ony memleketke aýdarýǵa mindetti agent retinde qyzmet atqarady. Sondyqtan zańdaǵy jańa ózgeristerden týyndaıtyn jeńildikter tikeleı qyzmetkerdiń tabysyna qosylady.

Sarapshylar qyzmetkerlerge esep bólimine baryp, jalaqynyń ósýin naqtylap suraýǵa keńes beredi. Buryn qoldanylǵan standartty shegerim 14 aılyq eseptik kórsetkishke negizdelse, endi 30 aılyq eseptik kórsetkishke saı bazalyq shegerim qoldanylady. Alaıda bul jeńildik avtomatty túrde júzege aspaıdy — salyqtyq shegerim tek qyzmetker esep bólimine resmı ótinish tapsyrǵan jaǵdaıda ǵana qoldanylady.