Qazaqstannyń iri altyn óndirýshileriniń biri shyǵynǵa batqan jobasynan qol úzdi. «AK Altynalmas» Jambyldaǵy Akbaqaı keni úshin qurylǵan enshilisin japty — bul sheshim salanyń ahýalyna da, jergilikti ekonomıkaǵa da áser etýi múmkin.
14 qańtarda bırjalyq habarlamada kompanıanyń «Akbaqaı Gold Resorsız» aksıonerlik qoǵamynan ıelik quqyǵyn toqtatqany kórindi. Qujatqa qaraǵanda, enshiles uıymdy 2025 jyldyń 31 jeltoqsanynda resmı túrde taratý aıaqtaldy.
Joba qalaı toqtady
«Akbaqaı Gold Resorsız» 2021 jyly tirkeldi. Bas dırektor bolyp Máken Ysqaqova kórsetildi. Enshiles uıym Akbaqaı kenin ıgerý, baǵaly metaldardy óndirý jáne óńdeý úshin quryldy.
Joba qarjylyq turǵydan mınýsqa ketti. Kompanıa aktıvteri 2022 jyly 1,16 mlrd teńgeden 2024 jylǵa qaraı 120,7 mln teńgege deıin qysqardy. 2022 jyly 223 mln teńge, 2023 jyly 9,3 mln teńge shyǵyn kórsetildi. Mindettemeler aktıvterden júzdegen mıllıonǵa artyq turdy.
2024 jyly jalǵyz aksıonerdiń sheshimimen kompanıa Qazaqstan qor bırjasynan shyǵaryldy. Sol kezde aksıalardyń balanstyq quny teriske ketken edi.
Akbaqaı keni týraly ne belgili
Akbaqaı keni Jambyl oblysynyń Moıynqum aýdanynda ornalasqan. Ken orny 1968 jyly ashyldy. Geologtar munda altynnyń tórt tıpin anyqtady. Alaıda óndiris pen óńdeý shyǵyny joǵary bolyp, joba komersıalyq tıimdilik bermedi.
Ieler quramy jáne qarjylyq kórinis
«AK Altynalmas» eldegi eń iri altyn óndirýshilerdiń qatarynda «Qazmyryshpen» birge atalady. Kompanıanyń úlesiniń 66,8%-yn Gouden Reserves B.V. (Nıderland) ustap otyr, 22,2%-yn bıznesmen Vladımır Djýmanbaev ıelenip otyr. Forbes málimetterinde onyń dáýleti 472 mln dollar shamasynda baǵalandy.
2025 jylǵy 1 qazanǵa «Altynalmas» aktıvteri 902 mlrd teńgeden asty, taza paıda 260,3 mlrd teńge boldy. 2025 jyldyń sońynda kompanıa úshinshi toqsan qorytyndysy boıynsha 127 mlrd 742,6 mln teńge dıvıdend tóleý týraly habarlady.
Bul týraly Qamshy.kz aqparat agenttigi habarlaıdy.
