Qonaev qalasynda mektep oqýshylary arasynda alǵash ret «Bolashaq chempıondar lıgasy» atty sport dodasy bastaý aldy. Jas sportshylardy biriktirgen bul jarys fýtbol, voleıbol jáne basketbol sport túrlerin qamtyp, aldaǵy eki aı boıy jalǵasady.

Jarystyń saltanatty ashylý rásimi erekshe formatta ótti. Sportshylar sherýi, akrobatıkalyq qoıylymdar men áserli shoý qatysýshylarǵa kóterińki kóńil-kúı syılady.

Qonaev qalasynyń ákimi Asqat Berdihanov jas sportshylarǵa sáttilik tiledi.

«Bul jarys – jaı ǵana báseke emes. Bul – dostyqtyń, tabandylyqtyń jáne jeńiske degen jigerdiń alańy. Búgingi alańda júrgen árbir jas sportshy – erteńgi el maqtanyshy, bolashaq chempıon. Qalada buqaralyq sportty damytýǵa erekshe kóńil bólinip keledi jáne mundaı jobalar jas býynǵa úlken serpin beredi», – dedi qala ákimi.

Shara barysynda qala ákimdigi tarapynan jas sportshylarǵa qoldaý retinde 600 dana dop tartý etildi.

Keshtiń sharyqtaý sátinde kórermender erekshe shoýǵa kýá boldy. Áskerı qyzmettegi qala turǵyny Aıdar Tezekov kúsh ónerin kórsetip, shegeni aǵashqa qolmen qaǵyp, gir tasynyń ústinde jattyǵý jasap, kópshilikti tańǵaldyrdy. Turǵynǵa sportqa degen súıispenshilikti qalyptastyrý jolyndaǵy eńbegi úshin qala ákiminiń Alǵys haty tabystaldy.

Saltanatty rásim barysynda «Bolashaq chempıondar lıgasynyń» kýbogi retrokólikpen sahnaǵa shyǵarylyp, jarys resmı túrde ashyq dep jarıalandy.

Atalǵan doda jas sportshylarǵa óz múmkindigin kórsetýge, tájirıbe jınaýǵa jáne úlken sportqa qadam jasaýǵa jol ashpaq.