Ilon Masktiń eks-qalyńdyǵy ıaǵnı bir ulynyń anasy Eshlı Sent-Kler Maskqa tıesili xAI kompanıasyn sotqa berdi. Ol Grok jasandy ıntellekti óziniń ruqsatynsyz jynystyq sıpattaǵy jalǵan (deepfake) sýretter jasaǵanyn málimdedi. Talap aryz Nú-Iork shtatynyń joǵarǵy sotyna berilgen.
27 jastaǵy Sent-Klerdiń aıtýynsha, Grok naqty adamdarǵa qatysty ádepsiz beıneler jasamaýǵa ýáde bergenine qaramastan, onyń atyna ondaǵan qorlaıtyn jáne zańǵa qaıshy sýretter taratylǵan. Keıbir materıaldarda ol kámeletke tolmaǵan keıipte kórsetilgen dep aıtylady.
Sent-Kler — ońshyl kózqarastaǵy saıası komentator jáne jazýshy. Ol Maskpen aradaǵy qarym-qatynasy úzilgenin, ekeýiniń 2024 jyly dúnıege kelgen ortaq balasy bar ekenin rastady.
Ony tehnologıalyq kompanıalardan zardap shekken adamdardyń quqyǵyn qorǵaýmen aınalysatyn advokat Kerrı Goldberg qorǵaýda. Advokattyń aıtýynsha, Grok qaýipsiz ónim emes jáne ol qasaqana qorlaý quralyna aınalǵan.
Sot qujattarynda X áleýmettik jelisi Sent-Klerdiń shaǵymdarynan keıin onyń akkaýntyn tabys tabýdan ajyratyp, oǵan qatysty jalǵan beınelerdiń odan ári taralýyna jol bergeni aıtylǵan.
Sent-Kler bul áreketter ózin qatty psıhologıalyq kúızeliske ushyratqanyn aıtyp, moraldyq jáne qarjylyq ótemaqy talap etýde.
Al Ilon Mask X platformasynda paıdalanýshylar jasaǵan kontentke ózderi jaýapty ekenin málimdedi. Onyń aıtýynsha, Grok ózdiginen sýret jasamaıdy, tek qoldanýshy suranysy boıynsha áreket etedi. X kompanıasy bolsa kámeletke tolmaǵandarǵa qatysty nemese ruqsatsyz jynystyq kontentke «múlde tózbeýshilik» saıasatyn ustanatynyn habarlady.
Sonymen qatar X kompanıasy qarsy talap aryz berip, platforma sharttaryna sáıkes istiń Nú-Iorkte emes, Tehasta qaralýy tıis ekenin alǵa tartty.
Sent-Kler buǵan deıin bergen suhbatytarynda ózin «qatty shoshynǵan ári jeke shekarasy buzylǵandaı sezingenin» aıtqan. Onyń sózinshe, bul — harassmenttiń taǵy bir quraly. «Máseleniń túp-tamyry — kelisimniń bolmaýynda», — dedi ol.
Qazirgi tańda Masktiń úsh áıelden 13 balasy bar ekeni belgili.
