Iranda oryndalýy tıis bolǵan 800 ólim jazasy ýaqytsha toqtatyldy. Bul týraly Aq úıdiń baspasóz hatshysy Kerolaın Lıvıtt bul týraly 15 qańtar kúni jýrnalıserge málimdedi, dep habarlaıdy "Qamshy.kz" aqparat agenttigi.
Lıvıtttiń aıtýynsha, prezıdent Iranda 14 qańtarda oryndalýy tıis bolǵan 800 ólim jazasy toqtatyldy degen aqparatqa súıenip otyr. Alaıda Aq úı ókili bul málimettiń qaı derekkózden alynǵanyn naqtylamady.
Buǵan deıin Donald Tramp «óte mańyzdy derekkózder» oǵan Irandaǵy ólim jazalary toqtaıtynyn habarlaǵanyn aıtqan. Sonymen qatar Aq úı prezıdenttiń jaǵdaıdy baqylap otyrǵanyn jáne áreket etýdiń barlyq nusqasy qarastyrylyp jatqanyn jetkizdi.
Al Hadath telearnasy Iran bıligi Irakpen shekaralas aımaqta áýe keńistigin jabýǵa buıryq bergenin habarlaǵan. Bul aqparat AQSH tarapynan áýe soqqysy bolýy múmkin degen joramaldarǵa túrtki boldy.
Bul jaǵdaıǵa qatysty Kerolaın Lıvıtt: «Prezıdent Tramptyń ne isteıtinin tek ózi ǵana biledi. Onyń josparynan óte az ǵana keńesshiler toby habardar», – dedi.
14 qańtarda Irannyń sot bıligi basshysy Golám Hoseın Mohsenı-Edjeı narazylyq kezinde ustalǵan 18 myń adamǵa qatysty sot isterin jedeldetip, olardyń bir bóligine ólim jazasyn qarastyrý qajettigin aıtqan.
Alaıda Irannyń syrtqy ister mınıstri Abbas Aragchı Fox News arnasyna bergen suhbatynda el bıliginiń «adamdardy darǵa asýǵa múlde jospary joq» ekenin málimdedi.
Aıta ketsek, jappaı narazylyqtar 2025 jyldyń 28 jeltoqsanynda bastalǵan. Sol kúni Tegeranda dúken ıeleri ekonomıkalyq jaǵdaıdyń nasharlaýyna narazylyq bildirip, saýda oryndaryn japqan. Keıin bul aksıalar basqa da iri qalalarǵa taraǵan.
30 jeltoqsanda narazylyq bildirýshiler men polısıa arasynda qaqtyǵys bolǵany, kúshtik qurylymdardyń kózden jas aǵyzatyn gaz qoldanǵany týraly aqparat tarady. Ýaqyt óte kele sherýler saıası sıpat alyp, qatysýshylar bıliktiń aýysýyn talap etip, «Dıktatorǵa ólim!» degen urandar aıta bastaǵan.
Iran ekonomıkasy joǵary ınflásıa (40% deńgeıinde) jáne Batys sanksıalary saldarynan qıyn jaǵdaıda ekeni aıtylyp otyr.
AQSH prezıdenti Donald Tramp 2 qańtar kúni Truth Social áleýmettik jelisinde eger kúshtik qurylymdar beıbit sherýshilerge oq atsa, AQSH aralasýy múmkin ekenin eskertken.
Keıin narazylyqtar tártipsizdikke ulasyp, Tegeran meri Alıreza Zakanıdiń málimetinshe, 9 qańtarǵa qaraǵan túni 50-den astam bank pen birneshe memlekettik mekeme órtke oranǵan. Sondaı-aq 30-dan astam meshittiń janyp ketkeni habarlandy.
