Premer-mınıstr Oljas Bektenov 2025 jylǵy 18 jeltoqsanda Qarjy mınıstrligine búdjet qarjysynyń tıimdi jumsalýyn qamtamasyz etý úshin Áleýmettik medısınalyq saqtandyrý qorynyń (ÁMSQ) jumysyn jan-jaqty taldaýdy tapsyrdy. Bul týraly Úkimettiń baspasóz qyzmeti málimdedi.
Júrgizilgen taldaý nátıjeleri boıynsha Qarjy mınıstri Mádı Takıev sońǵy jyldary búdjet shyǵystary aıtarlyqtaı artqanyna qaramastan, Áleýmettik medısınalyq saqtandyrý qorynyń tıimdiligi óspegenin málimdedi. Atap aıtqanda, 2026 jyly bul salaǵa bólinetin qarajat 2,4 trln teńgege jetip, 2020 jylmen salystyrǵanda 1 trln teńgege ulǵaıǵan. Soǵan qaramastan, qor qyzmetiniń nátıjeliligi tómen deńgeıde qalyp otyr.
2020 jyldan beri qordyń ınvestısıalyq tabysy 588 mlrd teńgeni quraǵan, onyń 195,9 mlrd teńgesi tek 2025 jylǵa tıesili. Alaıda taldaý kórsetkendeı, qarajattyń eleýli bóligi qor aktıvterinde jınaqtalyp, tikeleı medısınalyq qyzmet kórsetýge baǵyttalmaǵan.
Qarjy mınıstrligi júrgizgen medısınalyq aqparattyq júıelerdiń IT-aýdıti júıeli zańbuzýshylyqtardyń bar ekenin anyqtady. Olardyń qatarynda jalǵan pasıentterdi tirkeý, azamattarǵa tıesili emes qyzmetterdi kórsetý, bir qyzmetti MÁMS pen erikti medısınalyq saqtandyrý esebinen qatar qarjylandyrý, qysqa merzimde shekten tys kóp medısınalyq qyzmet kórsetý, sondaı-aq qaıtys bolǵan adamdarǵa qyzmet kórsetilgeni týraly derekter bar. Sonymen qatar balalarǵa táýligine myńdaǵan dári-dármek jazylǵan jaǵdaılar tirkelgen.
Mınıstr naqty mysaldar keltirdi. Máselen, Astana qalasyndaǵy bir jekemenshik klınıkada bir kúnde 1 442 pasıent qabyldanǵany kórsetilgen, bul qalypty jumys rejımine múlde sáıkes kelmeıdi. Sondaı-aq keıbir dárigerlerdiń bir aıda birneshe myń naýqasty qabyldaǵany nemese táýligine júzdegen tekserý júrgizgeni anyqtalǵan.
Taldaý barysynda 996 qaıtys bolǵan adamǵa qatysty 3 640 medısınalyq qyzmet kórsetý deregi tirkelgen. Budan bólek, pasıenttiń jynysyna sáıkes kelmeıtin skrınıngterdiń júzdegen myń jaǵdaıy anyqtalyp, memleketke 1,8 mlrd teńge shyǵyn keltirilgen. Balalarǵa arnalǵan dárilik zattardy jalǵan tirkeý faktileri de keńinen taralǵan.
Sondaı-aq qosarlanǵan qarjylandyrýdyń eki negizgi tetigi belgili boldy: jekemenshik klınıkalardyń bir mezgilde MÁMS pen jumys berýshilerdiń erikti medısınalyq saqtandyrýy arqyly tólem alýy jáne bir pasıenttiń bir ýaqytta eki medısınalyq uıymǵa tirkelýi.
Salyq organdary medısınalyq uıymdar basshylarynyń tabysy men múlkine de taldaý júrgizgen. Nátıjesinde 2024–2025 jyldary 1 465 basshynyń myńdaǵan jyljymaıtyn múlik pen júzdegen avtokólik satyp alǵany anyqtalǵan. Keıbir basshylardyń ondaǵan páter men birneshe avtokólik ıelengeni belgili boldy.
Sonymen qatar ÁMSQ men Densaýlyq saqtaý mınıstrliginiń aqparattyq júıeleri men normatıvtik bazasynyń ózara úılespeıtini atap ótildi. Biryńǵaı derekter qorynyń joqtyǵy júıeniń túpki nátıjege emes, jekelegen uıymdardyń qyzmetine baǵyttalýyna ákelgen.
Medısınalyq uıymdardyń materıaldyq-tehnıkalyq jaǵdaıy men kadrlyq áleýeti alǵash tekserilgennen keıin, keıingi baqylaý is júzinde júrgizilmeıdi. Al únemdelgen qarajatty búdjetke qaıtarý tetikteri qarastyrylmaǵandyqtan, júıede qarajatty tıimdi paıdalanýǵa emes, ıgerýge ynta qalyptasqan. Budan bólek, úsh myńnan astam tarıftiń bolýy medısınalyq qyzmetterdi basqarý men baqylaýdy kúrdelendirip otyr.
Osyǵan baılanysty Premer-mınıstr Oljas Bektenov birqatar tapsyrma berdi. Atap aıtqanda, anyqtalǵan barlyq derekter quqyq qorǵaý organdaryna joldanýy tıis, Áleýmettik medısınalyq saqtandyrý qory Qarjy mınıstrliginiń qaramaǵyna berilýi qajet. Sonymen birge densaýlyq saqtaý salasyndaǵy barlyq bıznes-prosesterdi tolyq sıfrlandyrý jáne ÁMSQ aktıvterin basqarý men ınvestısıalyq strategıany qaıta qaraý tapsyryldy.
Buǵan deıin Oljas Bektenov bıyl ÁMSQ-nyń bıznes-prosesterin avtomattandyrý jumystary tolyq aıaqtalýy tıis ekenin atap ótken bolatyn.
