Qazaqstandaǵy Reseıdiń mádenıet kúnderi aıasynda Qazaqstan Respýblıkasynyń Ulttyq mýzeıinde «Mádenı dástúrlerdi biriktirý jáne zamanaýı shyǵarmashylyq tájirıbeler: Qazaqstan men Reseıdiń mádenı yntymaqtastyǵy» taqyrybynda dóńgelek ústel ótti.
Jıynǵa QR Premer-Mınıstriniń orynbasary – Mádenıet jáne aqparat mınıstri Aıda Balaeva, Reseı Federasıasy mádenıet mınıstriniń orynbasary Andreı Malyshev, sondaı-aq eki eldiń mýzeı, teatr, bilim berý jáne kıno salasyndaǵy kásibı qaýymdastyq pen konserttik uıymdarynyń ókilderi qatysty.
Aıda Balaeva Qazaqstan men Reseı arasyndaǵy qarym-qatynasta mádenı yntymaqtastyqtyń aıryqsha mańyzǵa ıe ekenin atap ótti. Onyń aıtýynsha, taraptar birlesken kórmeler uıymdastyryp, kınofestıvalder ótkizip, óner ujymdarynyń gastrólderin jolǵa qoıyp keledi. Sondaı-aq mádenı-gýmanıtarlyq saladaǵy ózara is-qımyldyń jańa tetikterin birlese izdestirip otyr.
«Kezdesýlerimizdiń dástúrli sıpat alyp kele jatqany óte mańyzdy. Osydan bir jyl buryn da osyndaı dóńgelek ústelde bas qosyp, yntymaqtastyqtyń keleshegin talqylaǵan edik. Búginde mádenıet salasynyń is júzindegi barlyq baǵyty boıynsha naqty nátıjeler týraly nyq senimmen aıtýǵa tolyq negiz bar. Bul mýzeı jáne arhıv isinen bastap, teatrlar men konserttik uıymdar arasyndaǵy baılanystarǵa deıingi keń aýqymdy qamtıdy. Munyń bári osyndaı dıalogtyń naqty nátıje beretinin ári mádenı-gýmanıtarlyq baılanystarymyzdy mazmundyq turǵydan baıytyp, keńeıtýge jol ashatynyn kórsetedi. Búgingi kezdesý de ózara ustanymdardy taǵy bir pysyqtap, jańa bastamalar usynýǵa jáne birlesken is-sharalar aıasyn keńeıtýge múmkindik beredi», – dedi Aıda Balaeva.
Óz kezeginde Andreı Malyshev te Reseı tarapy Qazaqstanmen mádenı baılanystardy damytýǵa erekshe mán beretinin aıtty.
«Biz Qazaqstanmen mádenıet pen óner salasyndaǵy yntymaqtastyqqa aıryqsha mán beremiz. Baýyrlas Qazaqstan Reseıdiń mádenıet qaıratkerlerin erekshe yqylaspen qarsy alyp keledi. Bul eki eldi ortaq mádenı keńistik, rýhanı qundylyqtardyń sabaqtastyǵy baılanystyryp otyrǵanyn taǵy bir márte aıǵaqtaıdy. Sondaı-aq, Reseıde ótken Qazaqstan mádenıeti kúnderin de ystyq yqylaspen eske alamyz. Ol mańyzdy oqıǵaǵa aınalyp, shyǵarmashylyq baılanystarymyzdyń joǵary deńgeıin tanytty. Búgin biz úshin aldaǵy jyldardaǵy ózara yqpaldastyqtyń keleshegin talqylaý asa mańyzdy. Ásirese mýzeı isi, teatr salasy, bilim berý, kitaphana isi jáne yntymaqtastyqty naqty mazmunmen baıyta alatyn ózge de baǵyttar boıynsha pikir almasý qajet», – dedi Andreı Malyshev.
Dóńgelek ústelde mýzeı isine basymdyq berildi. Qazaqstan Respýblıkasynyń Ulttyq mýzeıi men İ Petr atyndaǵy Antropologıa jáne etnografıa mýzeıi qazaq etnografıalyq materıaldarynyń katalogyn birlesip ázirleý jóninde kelisimge keldi. Budan bólek, Memlekettik Ermıtajben birlesip, 2027 jyldyń kúzine josparlanǵan jańa arheologıalyq kórmeler men ózara ekspozısıalar daıyndaý jumystary júrgizilip jatyr.
Al, bıyl kúzde Qazaqstan Respýblıkasy Ábilhan Qasteev atyndaǵy Ulttyq óner mýzeıinde Memlekettik Tretákov galereıasy qorynan alynǵan týyndylar usynylatyn «HH vek rýsskogo ıskýsstva v 30 shedevrah» atty kórme ashylady.
Sonymen qatar restavrasıa salasyndaǵy áriptestik te jandana tústi. Qazaqstan tarapy osy baǵyttaǵy mamandardyń Reseı ortalyqtary bazasynda taǵylymdamadan ótý baǵdarlamalaryn jalǵastyrýǵa, sondaı-aq shekaralas aýmaqtardaǵy mýzeılermen katalogtaý jáne arhıv isi boıynsha birlesken jumysty tereńdetýge daıyn ekenin bildirdi.
Kınoındýstrıada festıváldik kórsetilimderden góri fılmderdi birlesip túsirý men ilgeriletýge basymdyq berile bastady. «ROSKINO» ókili ortaq praktıkalyq jobalardy júzege asyrýǵa qyzyǵýshylyq tanytty. Al, «Qazaqfılm» ulttyq kınostýdıasy daıyndyq kezeńi aıaqtalýǵa jaqyn qalǵan «Vremá» fılmi boıynsha jumysty jalǵastyrýǵa ázir ekenin rastady. Túsirilim jumystary Qazaqstan men Reseı aýmaǵynda ótedi dep josparlanyp otyr. Sonymen birge Reseıdiń Memlekettik kınoqorynda saqtalǵan qazaq kınosynyń qundy murasyn sıfrlandyrý isi qatar júrgizilip jatyr.
Kezdesý barysynda jas reseılik jáne qazaqstandyq kompozıtorlar arasyndaǵy kásibı tájirıbe almasý máseleleri de sóz boldy. Sondaı-aq, jaz mýzykasyn damytýǵa basymdyq berý jáne konserttik alańdar arqyly ózara yqpaldastyqty jetildirý joldary talqylandy. Horeografıa ónerin órkendetý máselesine de erekshe nazar aýdaryldy. Bul baǵytta birlesken bilim berý bastamalaryn, taǵylymdama baǵdarlamalaryn, sheberlik sabaqtaryn júzege asyrý, sondaı-aq eki eldiń beıindi akademıalarynda qos dıplomdy daıarlaý júıesin engizý perspektıvasy qarastyryldy.
Jıyn sońynda Aıda Balaeva aıtylǵan barlyq usynys aldaǵy jumystyń ózegine aınalatynyn jetkizdi. Sondaı-aq, ol 2027-2028 jyldarǵa arnalǵan ózara is-qımyl jospary barlyq taraptyń naqty usynystarymen tolyǵa túsetinine senim bildirdi.
Kezdesý qorytyndysy boıynsha Qazaqstan Respýblıkasynyń Ulttyq mýzeıi men Reseı Federasıasynyń Reseı etnografıalyq mýzeıi arasynda yntymaqtastyq týraly memorandýmǵa qol qoıyldy. Qujat taqyryptyq katalogtardy birlesip ázirleýdi, ǵylymı jáne ádistemelik baǵyttardy damytýdy, sondaı-aq sýretshiler, restavratorlar jáne mýzeı isiniń ózge de mamandary arasyndaǵy baılanysty nyǵaıtýdy kózdeıdi.
QR Mádenıet jáne aqparat mınıstrliginiń baspasóz qyzmeti
