Almaty oblysynyń ákimi Marat Sultanǵazıev Qytaı Halyq Respýblıkasyna issapary kezinde «Xinjiang Commercial Logistics (Group) Co., Ltd.» kompanıasynyń basshysy Shen Szınshenmen kezdesti. Atalǵan kompanıa saýda jáne logıstıka salasynda zor áleýetke ıe. «Bir beldeý – bir jol» bastamasyn júzege asyrýǵa úlken úles qosyp keledi.
Kezdesý barysynda eki jaqty saýda-ekonomıkalyq baılanys, transporttyq-logıstıkalyq ınfraqurylym, halyqaralyq tasymaldaý, logıstıkany sıfrlandyrý jáne agroónerkásip ónimderin eksporttaý máseleleri talqylandy.
Óz sózinde Marat Eleýsizuly kompanıanyń qarqyndy damýyn joǵary baǵalaıtynyn atap ótti. Almaty oblysy Qytaı men Orta Azıa arasyndaǵy negizgi transport joldarynyń qıylysynda ornalasqanyn, Shyńjań uıǵyr avtonomıalyq aýdany úshin strategıalyq mańyzdy seriktes ekenine toqtaldy.
«Dostyq qarym-qatynastyń arqasynda Almaty oblysy men Qytaı eli arasyndaǵy taýar aınalymy jyldaǵy dástúrge saı joǵary deńgeıin saqtap keledi. Sońǵy úsh jyl ishinde taýar aınalymy turaqty túrde 1 mlrd AQSH dollarynan asty. Búgingi tańda oblysta Qytaı kapıtalynyń qatysýymen 143 kásiporyn jumys isteıdi. Biz saýda-ekonomıkalyq baılanysty ári qaraı nyǵaıtýǵa úlken mán beremiz», – degen aımaq basshysy eki jaqty baılanystyń mańyzdy baǵyttaryna toqtaldy. Aıtýynsha, eń aldymen transporttyq-logıstıkalyq ınfraqurylymdy damytý mańyzdy. Bul baǵytta Almaty oblysynda zamanaýı logıstıkalyq ortalyqtar, qoıma keshenderi men mýltımodaldy habtar qurý kózdelip otyr. Sonymen qatar halyqaralyq tasymaldaý salasyndaǵy baılanysty arttyrýǵa basymdyq berildi. Atap aıtqanda, «Batys Eýropa – Batys Qytaı» baǵytyndaǵy marshrýttardy damytý, qurǵaq porttar men shekaradaǵy ótkizý pýnktteriniń múmkindigin tıimdi paıdalaný arqyly tranzıttik áleýetti arttyrý josparlanǵan. Odan bólek, logıstıkany sıfrlandyrý, ıaǵnı zamanaýı tehnologıalar men platformalardy engizý arqyly júk tasymaldaýdy basqarý jáne elektrondy saýdany damytý da negizgi mindetterdiń biri retinde qarastyryldy.
Aımaq basshysy Almaty oblysy Qazaqstandaǵy aýyl sharýashylyǵy qarqyndy damyp kele jatqan óńirlerdiń biri ekenin aıtty. Ekologıalyq taza aýyl sharýashylyǵy ónimderin Qytaı jáne halyqaralyq naryqqa shyǵarý úshin kompanıanyń logıstıkalyq jáne saýda múmkindigin paıdalanýǵa múddeli ekenin jetkizdi.
İssapar barysynda oblys delegasıasy «XINJIANG COMMERCIAL LOGISTICS (GROUP) Co., Ltd.» kompanıasynyń tórt enshiles kásipornymen tanysty. Onyń quramyna joǵary tehnologıalyq jabdyqtarmen aınalysatyn «Xinjiang Machinery Research Institute Co., Ltd.,» jemis-jıdek pen orman ónimderin shyǵaratyn «Xinjiang Fruit Industry Group», sapa standarttary men ónerkásiptik saraptamany júrgizetin «Xinjiang Standard Testing and Certification Company Limited», sondaı-aq halyqaralyq qurǵaq port logıstıkasy baǵytynda jumys isteıtin Shyńjań kompanıasy kiredi.
Júzdesý nátıjesinde halyqaralyq tasymaldaý salasynda Qazaqstandaǵy iri kompanıalardyń biri «Atasu Group» pen Shyńjań halyqaralyq qurǵaq port kompanıasy quny 270 mln dollar turatyn memorandýmǵa qol qoıdy. Bul birlesken jobalardy iske asyrýǵa, uzaq merzimdi seriktestikti nyǵaıtýǵa jol ashady.
