Qonaev qalasyna qarasty Sheńgeldi aýyldyq okrýginiń Kerbulaq jáne Sarybulaq aýyldarynda jyldar boıy turǵyndardy alańdatqan aýyz sý máselesi oń sheshimin tapty. Endi bul eldimekenderde sý qysymy aıtarlyqtaı kóterilip, halyqtyń kúndelikti turmysyndaǵy eń ózekti túıtkilderdiń biri joıyldy.Osyǵan deıin aýyl turǵyndary ásirese jaz mezgilinde sý tapshylyǵyn qatty sezinetin. Kún ysyǵan ýaqytta baý-baqsha sýarý, mal-janǵa qaraý, úı sharýasyna qajettilik artqan saıyn ortalyq júıedegi sý qysymy kúrt tómendep, keı úılerge sý múlde jetpeı qalatyn.
Atalǵan eki aýylda búginde 437 abonent tirkelgen. Buǵan deıin eldimekender 300 tekshe metrlik rezervýar arqyly ǵana sýmen qamtylyp kelgen. Alaıda tutyný kólemi artqan saıyn bul qýat jetkiliksiz boldy. Osyǵan baılanysty qosymsha 25 tekshe metr sý jınaıtyn sý munaralary ornatylyp, júıege qosyldy.
Mamandardyń aıtýynsha, sý munarasy sý júıesindegi qysymdy turaqty ustap turatyn mańyzdy ınjenerlik qurylǵy sanalady. Munara bıikte ornalasqandyqtan, jınalǵan sý tómenge tabıǵı qysymmen taralady. Sonyń arqasynda sý tek ortalyq kóshelerge emes, eń shetki úılerge deıin birqalypty jetedi.
Ózgeristi turǵyndar da birden baıqaǵan.
«Sý munarasy iske qosylǵanyna úsh kúnnen asty. Qazirdiń ózinde aıyrmashylyq anyq seziledi. Buryn keı ýaqytta sý jińishkerip, keıde múlde toqtap qalatyn. Qazir qysym áldeqaıda jaqsy. Endi alańsyz kókónis egip, jemis-jıdek sýaryp, kúndelikti tirligimizdi jasaıtyn boldyq», – deıdi Sarybulaq aýylynyń turǵyny Qýanysh.
Sheńgeldi aýyldyq okrýgi ákiminiń orynbasary Jandos Maneevtiń aıtýynsha, másele uzaq ýaqyt baqylaýda bolyp, turǵyndardyń ótinishi negizinde sheshilgen.
«Munymen jumys toqtamaıdy. Qonaev qalasynyń Keshendi damý josparyna sáıkes, aldaǵy ýaqytta Kerbulaq, Sarybulaq, Sheńgeldi jáne Aqózek eldimekenderindegi sý qubyrlary tolyq jańartylady. Jobalyq-smetalyq qujattary daıyndalyp, memlekettik saraptamanyń oń qorytyndysy alynǵan», – dedi ol. Sońǵy jyldary Sheńgeldi aýyldyq okrýginde ınfraqurylymdy jańǵyrtý jumystary kezeń-kezeńimen júrgizilýde. Byltyr bes aýylǵa jańa jol tóselse, bıyl tirshilik nárine qatysty túıtkil tarqatyldy.
