Qonaev qalasynda tozyǵy jetken káriz jelilerin tolyq jańǵyrtý bastalady. Jýyrda Qonaev kóshesiniń boıynda jáne HQKO ǵımaratynyń aldynda bolǵan apattardan keıin ınjenerlik komýnıkasıalardy merziminen buryn aýystyrý týraly sheshim qabyldandy.
Eske salaıyq, birneshe apta buryn qaladaǵy ortalyq kóshelerdiń birinde asfált opyrylyp, apatty jaǵdaı tirkelgen edi. Mamandardyń aıtýynsha, oǵan eskirgen káriz qubyrlary sebep bolǵan. Qazirgi tańda apat saldary joıylǵanymen, mundaı jaǵdaılardyń qaıtalaný qaýpi áli de saqtalyp otyr.
Máseleniń qalaı sheshiletini týraly Qonaev qalasy ákiminiń orynbasary Tımýr Aqmyrzaev aıtyp berdi. Onyń sózinshe, «Energetıkalyq jáne komýnaldyq sektordy modernızasıalaý» ulttyq jobasy aıasynda káriz jelilerin qaıta jańartý jáne salý boıynsha keshendi jumystar josparlanǵan.
«Qazirgi káriz qubyrlary 58 jyl buryn salynǵan. Ulttyq joba aıasynda olardy jańartý 2027 jylǵa josparlanǵan bolatyn. Alaıda sońǵy apattardan keıin jobany jedeldetip, qurylysty 2026 jylǵa aýystyrý týraly sheshim qabyldandy. Uzyndyǵy 6 shaqyrymnan asatyn káriz jelileri tolyq jańǵyrtylady. Qurylys jumystary aldaǵy bir aı ishinde bastalady», – dedi ákim orynbasary.
Budan bólek, bıyl ulttyq joba sheńberinde Almaty jáne Seıfýllın kóshelerindegi aýyz sý jelilerin jańartý bastalady. Sonymen qatar jylý júıelerin modernızasıalaý boıynsha eki iri jobany iske asyrý josparlanǵan.
«2026 jyly ulttyq joba aıasynda ınjenerlik ınfraqurylymǵa qatysty 5 joba júzege asyrylady. Kelesi jylǵa taǵy 4 joba josparlanǵan. Nátıjesinde qaladaǵy 67 shaqyrym ınjenerlik jeli jańǵyrtylady», – dedi Tımýr Aqmyrzaev.
Sonymen qatar qalada 11 káriz-sorǵy stansıasyn jańǵyrtý jumystary qatar júrgizilýde. Qazirgi tańda eki nysanda qurylys-montaj jumystary júrip jatyr. Jobany jaqyn arada tolyq aıaqtaý kózdelip otyr.
Ákim orynbasarynyń aıtýynsha, káriz-sorǵy stansıalary – búkil sý burý júıesiniń negizgi bóligi. Olar aǵyn sýlardy tazartý nysandaryna aıdaıdy. Sorǵy jabdyqtaryn aýystyrý jáne stansıalardy jańartý júıeniń senimdiligin arttyryp, turǵyndarǵa kórsetiletin komýnaldyq qyzmet sapasyn jaqsartýǵa múmkindik beredi.
Qaladaǵy taǵy bir ózekti másele – tazartý nysandarynyń ábden tozýy. Qazirgi káriz-tazartý júıesiniń tozý deńgeıi 100 paıyzǵa jetken. Osyǵan baılanysty memlekettik-jekemenshik áriptestik aıasynda jańa káriz-tazartý kesheniniń qurylysy júrgizilýde.
Jańa nysan Qonaev qalasynan 20 shaqyrym jerde ornalasady. Qazir qurylys alańynda jer jumystary bastalǵan. Keshenniń qýattylyǵy saǵatyna 1600 tekshe metr sýdy qabyldaýǵa jetedi.
Bul joba qala turǵyndary úshin asa mańyzdy. Sebebi eski tazartý nysandarynan shyǵatyn jaǵymsyz ıiske qatysty turǵyndardan jıi shaǵym túsetin. Jańa keshen iske qosylǵannan keıin eski nysan rekýltıvasıalanyp, ekologıalyq másele tolyq sheshimin tappaq.
Qurylys jumystaryn eki jyl ishinde aıaqtaý josparlanyp otyr. Jobanyń jalpy quny – 33 mlrd teńge.
Osylaısha, Qonaevta ondaǵan jyl boıy jańartylmaǵan ınjenerlik ınfraqurylymdy kezeń-kezeńimen modernızasıalaý júrip jatyr.
