Oblys ákimi Berik Ýálı Jeńis kúni qarsańynda soǵys ardageri, mereke kúnderine oraı Máskeýge barǵan Grıgorıı Malarovqa baılanysqa shyǵyp, merekemen quttyqtady.
Aımaq basshysy búginde Abaı oblysyndaǵy kózi tiri jalǵyz maıdangerge Qazaqstan Respýblıkasynyń Prezıdenti Qasym-Jomart Toqaevtyń quttyqtaý hatyn oqyp berdi.
«Sizdiń ómir jolyńyz jas urpaq úshin shynaıy otansúıgishtiktiń úlgisi bolyp sanalady. «Eshkim de umytylmaıdy, eshnárse de umyt qalmaıdy» – Jeńis kúniniń barlyq mán-maǵynasy osy sózderge syıyp tur. Halqymyz maıdangerler men tyl eńbekkerleriniń teńdessiz erligin árdaıym este saqtap, qurmetteıtin bolady. Barsha otandastarymyzdyń atynan Sizge zor densaýlyq pen baq-bereke tileımin!», – delingen quttyqtaýda.
Ardagerge memleket tarapynan 5 mıllıon teńge qarjylaı syıaqy berildi.
Bıyl jazda 100 jasqa tolatyn Grıgorıı Malarov 19 jasynda Otan qorǵaýǵa attanyp, soǵys jyldarynda maıdan jolynan ótti. 2-shi Baltyq maıdany quramynda Estonıa men Polshany azat etý shaıqastaryna qatysyp, Berlınge deıin jetti. Maıdandaǵy qaısarlyǵy arqyly Jeńisti jaqyndatýǵa óz úlesin qosty.
Soǵystan keıingi jyldary Shúlbi GES-inde bas ekonomıs qyzmetin atqardy. Energetıka salasynyń damýyna qosqan úlesi men kóp jylǵy adal eńbegi úshin «Eren eńbegi úshin» jáne «Eńbek ardageri» medaldarymen marapattaldy.
Aımaq basshysy búgin sondaı-aq Semeı qalasynda turatyn tyl ardagerleri Shaıhslám Úskenbaev pen Ivan Belgerdiń shańyraǵyna baryp, merekemen quttyqtady.
Shaıhslám Úskenbaev soǵys bastalǵan jyly 13 jasta bolǵan. Ákesi sol jyldary eńbek armıasyna ketip, sheshesi aýylda qalyp áskerlerge qolǵap toqyp, aýyl sharýasyna aralasqan. Ol 14 jasynan bastap kolhoz jumysynda eńbek etti.
Maıdannan keıingi jyldary halyq depýtattary keńesi janyndaǵy aýyldyq keńestiń tóraǵasy qyzmetin atqaryp, el ishinde syıly azamat retinde tanyldy. Qoǵamdyq jumystarǵa belsene aralasyp, óńirdiń áleýmettik damýyna úles qosty. Búginde Semeı qalasynda urpaqtarynyń ortasynda baqytty ǵumyr keship otyr. Toqsan segiz jasqa kelgen qarıa soǵys jyldaryndaǵy janqıarlyq eńbegi úshin birqatar memlekettik nagradalarmen marapattalǵan. Aqsaqal lebizin bildirip, keıingi urpaqqa aq batasyn berdi.
Ivan Belger 1927 jyly dúnıege kelgen. Ekinshi dúnıejúzilik soǵys bastalǵan kezde eńbekke erte aralasyp, orman sharýashylyǵynda júrgizýshi, keıin mehanık bolyp uzaq jyl eńbek etti. Maıdan jyldarynda Qazaqstanǵa jer aýdarylǵan Belgerler otbasy Pavlodar óńirine qonystanyp, keıin Maıqaraǵaı orman sharýashylyǵynda turaqtaǵan. Ivan Ivanovıch nebári 15 jasynda úlken júk kólikterin júrgizip, eńbek maıdanyna aralasty. Keıin Ekibastuz qalasynda kómiravtomatıka salasynda bas mehanık bolyp eńbek etip, 58 jyldyq eńbek ótilimen zeınetke shyqqan. Qazirgi tańda Semeı qalasynda turady. 99 jastaǵy qarıa «Eren eńbegi úshin», «Tyń jerlerdi ıgergeni úshin», «Eńbek ardageri» sekildi kóptegen medaldarmen marapattalǵan.
Oblys ákimi tyl eńbekkerlerin Jeńis kúnimen quttyqtap, olardyń ómir joly keıingi urpaq úshin úlken ónege ekenin atap ótti.
«Soǵys jyldary bar aýyrtpalyqty kóterip, tylda tynymsyz ter tógip, eldiń eńsesin tikteýge ólsheýsiz úles qostyńyzdar. Mereke qarsańynda hal-jaǵdaılaryńyzdy bilip, oblys jurtshylyǵy atynan quttyqtaıyq dep arnaıy kelip otyrmyz. Sizderdiń ómir joldaryńyz keıingi urpaqqa úlgi-ónege, úlken mektep», – dedi Berik Ýálı.
Aıta keteıik, óńirimizden 100 myńǵa jýyq azamat otan qorǵaýǵa attanyp, olardyń 44 myńnan astamy týǵan jerge oralmady. Maıdan dalasynda kórsetken teńdessiz erligi úshin 56 jerlesimizge Keńes Odaǵynyń Batyry ataǵy berildi.
