Almaty oblysynda bıyl agroónerkásiptik keshendi damytý baǵytynda jalpy quny 44,6 mlrd teńgeni quraıtyn 7 ınvestısıalyq jobany iske asyrý josparlanyp otyr. Jobalar aýyl sharýashylyǵy óndirisin keńeıtip, óńirdiń azyq-túlik qaýipsizdigin arttyrýǵa jáne jańa jumys oryndaryn qurýǵa baǵyttalǵan.
Almaty oblysynyń Aýyl sharýashylyǵy basqarmasynyń málimetinshe, atalǵan jobalar agroónerkásip salasyna ınvestısıa tartý arqyly óńdeý ónerkásibin damytýǵa jáne aýyl sharýashylyǵy ónimderiniń básekege qabilettiligin arttyrýǵa múmkindik beredi.
Sonymen qatar, aýyl sharýashylyǵy taýar óndirýshilerin qoldaý maqsatynda birqatar memlekettik baǵdarlamalar júzege asyrylyp jatyr. Solardyń biri – «SQO tájirıbesimen AÓK salasyndaǵy ınvestısıalyq jobalardy nesıeleý baǵdarlamasy». Baǵdarlama aıasynda 4 mlrd teńge qarastyrylyp, eki joba qarjylandyryldy. Atap aıtqanda, sý únemdeý tehnologıalaryn engizýge baǵyttalǵan «Alfalfa» JSHS jobasyna 1,5 mlrd teńge, al júgerini qaıta óńdeý zaýytyn keńeıtý jobasyna «Azıa agro fýd» AQ-na 2,5 mlrd teńge bólindi.
Budan bólek, 2026 jyly osy baǵdarlama sheńberinde 5 mlrd teńgege taǵy 4 jobany iske asyrý josparlanǵan.
Almaty oblysynyń aýyl sharýashylyǵy basqarmasynyń basshysy Dımash Sydyqovtyńaıtýynsha, óńirde agroónerkásip salasyna ınvestısıa tartý – aýyl sharýashylyǵyn jańǵyrtýdyń negizgi baǵyttarynyń biri.
«Bıyl iske asatyn jobalar óńirdegi agroónerkásiptik keshenniń óndiristik áleýetin arttyryp, zamanaýı tehnologıalardy engizýge múmkindik beredi. Bul óz kezeginde ónim kólemin ulǵaıtyp qana qoımaı, aýyl sharýashylyǵy ónimderin tereń óńdeýdi damytýǵa jáne jańa jumys oryndaryn ashýǵa jol ashady», – dedi Dımash Sydyqov.
Sonymen qatar, Aýyl sharýashylyǵy mınıstrligi men «Báıterek» ulttyq basqarýshy holdıńi birlesip qalyptastyrǵan «Investısıaǵa tapsyrys» aıasynda jalpy quny 708,7 mlrd teńgeni quraıtyn 26 jobany qarjylandyrý múmkindigi qarastyrylyp jatyr.
Aıta keteıik, 2025 jyly Almaty oblysynyń agroónerkásiptik keshenine tartylǵan ınvestısıa kólemi (alkogóldi sýsyndardy esepke almaǵanda) 178,2 mlrd teńgeni qurap, jospar 145,4%-ǵaoryndaldy. Jospar boıynsha 122,6 mlrd teńge kózdelgen edi.
Sondaı-aq, bekitilgen Jol kartasy aıasynda ótken jyly jalpy quny 29 mlrd teńgeni quraıtyn 14 joba iske asyryldy. Olardyń qatarynda 9 sút fermasy, 1 jylyjaı kesheni, 1 balyq sharýashylyǵy, 1 kókónis qoımasy, 1 vafeldi nan ónimderin óndiretin zaýyt jáne 1 qus fabrıkasy bar.
