«Naýryznama» onkúndigi aıasynda Almaty oblysynda Ulttyq sport kúni buryn-sońdy bolmaǵan aýqymda ótip, 600 myńnan astam adamnyń basyn qosty. Jarystar men merekelik is-sharalar óńirdiń árbir aýdanyn, qalasy men aýyldyq okrýgin — ortalyq qalalardan bastap iri eldi mekender men aýyldarǵa deıin túgel qamtydy.
Jalpy alǵanda, ondaǵan alańda dástúrli sport túrlerinen týrnırler, halyqtyq oıyndar men ulttyq naqyshta kórmeler uıymdastyryldy. Mereke birlik pen urpaqtar sabaqtastyǵynyń, ulttyq muraǵa degen qurmettiń naǵyz sımvolyna aınaldy.
Merekeniń basty alańy Qonaev qalasy boldy. Munda ulttyq sport túrlerinen aýqymdy festıvál jalaýyn jelbiretti. Qala keńistigi tiri dástúrler mekenine aınalyp, kórermender qazaq mádenıetiniń rýhyn tereń sezinýge múmkindik aldy. Mereke jarqyn emosıalar men mazmundy baǵdarlamaǵa toly boldy.
Qatysýshylar kúsh-qaıraty men eptiligin kórsetse, kórermender olardy qyzý qoldap, naǵyz halyqtyq toıdyń atmosferasyn qalyptastyrdy. Ásirese, ár beldesýi minez synaǵyna aınalǵan qazaq kúresi, sondaı-aq kóptegen qatysýshy men jankúıer jınaǵan asyq atý men bes asyq oıyndary erekshe qyzyǵýshylyq týdyrdy. Arqan tartys pen buqa tartys ta tartysty ótti, munda tek qara kúsh qana emes, komandalyq rýh ta sheshýshi ról atqardy.
Festıváldiń ashylýynda Almaty oblysy ákiminiń orynbasary Ǵanı Maılybaev Ulttyq sport kúniniń mańyzdylyǵyna toqtalyp, turǵyndardy Naýryz merekesimen quttyqtady: «Barsha Almaty oblysynyń turǵyndaryn Naýryz meıramymen shyn júrekten quttyqtaımyn! Ulttyq sport kúni — bul jaı ǵana jarys emes, bul bizdiń tarıhymyzdyń, minezimiz ben birligimizdiń kórinisi. Osynaý kóktem kúnderinde urpaqtar baılanysy erekshe seziledi: úlkender dástúrdi amanattasa, jastar ony maqtanyshpen qabyldap, damytyp keledi. Búgin alańdarda bizdi myqty etetin shynaıy qýanysh pen birliktiń rýhyn kórip otyrmyz».
Kúsh synasatyn sport túrleri eń qyzyqty sátterdiń biri boldy. Buqa tartysta 18 jastan asqan erler tózimdiligi men qaısarlyǵyn kórsetse, arqan tartysta komandalar fızıkalyq kúshpen qatar úılesimdi is-qımyl arqyly jeńiske umtyldy. Dástúrli oıyndar da kórermenderdi tánti etti:
- Láńgi tebýde qatysýshylar eptilik pen úılesimdilik tanytty.
- Asyq atýda mergendik, esep pen sýyqqandylyq basty ról atqardy.
- Bes asyq oıynynda reaksıa jyldamdyǵy men dáldik aldyńǵy planǵa shyqty.
Qatysýshylar arasynda Qazaqstan chempıondary Talshyn Aslanbekqyzy men Janel Ǵabıt boldy. Olar bul týrnırde de ózderiniń joǵary daıyndyq deńgeıin dáleldedi. «Bul týrnırde qatysýshylardyń deńgeıi óte joǵary boldy, ár oıyn sońǵy sátke deıin shıelenisti ótti. Elimizde bes asyqqa degen qyzyǵýshylyqtyń artyp kele jatqany qýantady», — dep atap ótti Janel Ǵabıt.
Oblys aýdandarynda da is-sharalar aýqymdy ótti:
- İle aýdanynda myqty palýandardyń qatysýymen qazaq kúresinen iri týrnır uıymdastyryldy.
- Eńbekshiqazaq aýdanynda kórermenderdi saıatshylyq — ejelgi qus salý óneri qyzyqtyrdy.
- Basqa aýdandarda toǵyzqumalaq, asyq atý jáne ózge de ulttyq sport túrlerinen jarystar ótti.
Ulttyq sport kúni Almaty oblysynda dástúrlerdiń jańasha qarqynmen damyp, mádenıet pen salaýatty ómir saltyna degen qyzyǵýshylyqty arttyryp jatqanynyń aıqyn dáleli boldy.
