Konstıtýsıalyq reforma jónindegi komısıanyń kezekti otyrysynda Memlekettik keńesshi Erlan Qarın qoldanystaǵy Ata zańnyń 3 babyndaǵy «Bıliktiń birden-bir bastaýy – halyq» degen sózdi Jańa konstıtýsıada «Memlekettik bıliktiń birden bir bastaýy jáne Egemendik ıesi – Qazaqstan halqy» dep ózgertý usynylǵanyn jetkizdi. Árıne, «Egemendik ıesi - Halyq» ekeni kez kelgen táýelsiz, demokratıalyq memlekettiń buljymas qaǵıdasy.
Komısıa otyrysynan bilgenimiz, Konstıtýsıaǵa ózgeris emes Jańa Konstıtýsıa qabyldanatyny anyq boldy. Eger bastamashy toptyń sózderine sensek bul Konstıtýsıa «ótkenimizdi, búgingi kúnniń qaǵıdattaryn jáne erteńgi kúnniń baǵdaryn belgileıtin tolyqqandy, tuǵyry bekem, suranysqa tolyq saı keletin» qujat bolmaq. Osyǵan deıin «myń ólip, myń tirilgen» basty zańymyz endi ózgermesin desek asyǵys sheshimnen góri baısaldy baıyp pen halyqtyq talqy qajet. Ásirese Jańa Konstıtýsıanyń preambýlasyn Túrik balasynyń basty jádigeri «Kúltegin eskertkishindeı» tasqa qashamasaq ta, ult taǵdyry talapaıǵa túspeıtindeı tańbalaýymyz eń negizgi mindet bolmaq.
Toqaev kezeńiniń basty urandarynyń biri – ádilettilik. Endeshe yqylym zamannan memlekettiliktiń túp qazyǵy, altyn dińgegi bolyp otyrǵan Qazaq ultynyń statýsyn Jańa konstıtýsıada naqtylaý - «Ádilettiliktiń» naǵyz bastaýy bolar edi. Biz munda Ulttyq ústemdik, qandaıda bir aıryqsha mártebe týraly aıtyp otyrǵan joqpyz. Eger Memlekettik keńesshi aıtqandaı Ata zańnyń preambýlasynda Memlekettiligimizdiń tarıhı joly men órkenıet bastaýlary jazylatyn bolsa, onda qazirgi Qazaqstannyń Saq, Ǵun, Úısin, Túrik, Altyn Orda ulystarynyń, Qazaq handyǵynyń zańdy murageri, «Alashorda» avtonomıasynyń jalǵasy ekendigin anyq, ashyq jazý kerek.  
Sondyqtan:
- Qazaqstan Respýblıkasy – «Altyn Orda» ımperıasynyń zańdy murageri, «Alashorda» úkimetiniń zańdy jalǵasy retinde qazaq jerinde qurylǵan táýelsiz memleket.
- Memlekettik bıliktiń birden bir bastaýy jáne Egemendik ıesi – Memleketqurýshy qazaq ulty jáne tarıh kóshinde qazaq jerine qonys aýdaryp, mekendep qalǵan, Qazaqstan Respýblıkasyn «Otanym» dep sanaıtyn Memleketquraýshy barlyq etnos ókilderi.
- Qazaqstan Respýblıkasynyń Memlekettik tili – qazaq tili. Memleket ózge etnos ókilderiniń tilin saqtaýǵa, mádenıetin damytýǵa, memlekettik saıasatty dáripteýde aýdarma qyzmetin paıdalanýǵa barynsha jaǵdaı jasaıdy.
- Qazaqstan Respýblıkasynan tys jerde jasaıtyn ulty qazaq azamattar kez kelgen ýaqytta Atajurtqa oralyp, jeńildetilgen tártippen azamattyq alýǵa quqyly. Tıisinshe Qazaqstan Respýblıkasynyń azamattyǵyn alǵysy keletin kez kelgen azamat memlekettik tildi bilýge, qazaq mádenıeti men salt-dástúrin uǵynýǵa, qurmetteýge jáne sony dáleldeý úshin arnaıy emtıhan synaǵynan ótýge mindetti.
 
Eger shyn máninde myzǵymas Jańa Konstıtýsıa qabyldaımyz desek osy tórt tarmaq Ata zańnyń preambýlasynda anyq jazylýy tıis. Bul eń aldymen qazaq ultynyń jaýapkershiligin arttyrady. Ózge ulttardyń el men jerdi syılaýyna, Memlekettik tildi meńgerýine adaspas baǵdar silteıdi. Qalaı desekte táýelsizdik, eń aldymen qazaqqa kerek ekeni zańdylyq. Óıtkeni dúnıejúzinde qazaqtyń bir ǵana memleketi bar.
 
Aqyry «Egemendik ıesi – Qazaqstan halqy» degendi Ata zańǵa engizedi ekenbiz, endeshe joǵarydaǵy tórt tarmaqty mindetti túrde Konstıtýsıanyń preambýlasyna jazýymyz kerek. Eldiń demografıalyq ósimi, ulttyń oıanýy kóz ilespes jyldamdyqpen damyp jatqan qazirgi kezeńde atalǵan taraýlar eldiń bas qujatynda kórinis tappasa, kóp uzamaı-aq taǵy da «Jańa Konstıtýsıa jazý» talaby kún tártibine shyǵary sózsiz.