Jańa Konstıtýsıanyń qabyldanýyna jáne referendýmnyń sátti ótýine oraı Májilistegi «AMANAT» partıasy fraksıasynyń jıyny ótti. Depýtattar daýys berý nátıjesi azamattardyń tarıhı tańdaýyna aınalǵanyn jáne Prezıdent Qasym-Jomart Toqaevtyń reformalar baǵytyna degen qoǵamnyń keń qoldaýyn rastaǵanyn atap ótti. İs-sharaǵa beınekonferensbaılanys rejımi arqyly óńirlik máslıhattardaǵy partıa fraksıalary da qatysty.
Májilis Spıkeri, «AMANAT» partıasynyń Tóraǵasy Erlan Qoshanov qazaqstandyqtardyń basym kópshiligi jańa Konstıtýsıany qoldaǵanyn atap ótip, barsha azamatty osy jeńispen quttyqtady. Ortalyq referendým komısıasynyń málimetine sáıkes, oǵan qatysqan adamdardyń 87,15%-y jańa Konstıtýsıaǵa daýys berdi. Onyń aıtýynsha, mundaı joǵary nátıje azamattardyń saıası mádenıeti artqanyn jáne olardyń Ádiletti Qazaqstandy qurýǵa degen umtylysyn aıqyn kórsetedi.
«15 naýryz el shejiresinde eleýli oryn alǵan tarıhı oqıǵa boldy. Bul – jurtymyzdy jumyldyrǵan, ultymyzdy uıystyrǵan aıtýly kún. Qýatty, Ádiletti, Progresıvti Qazaqstandy tańdaǵan kún. Ol – memleket damýyndaǵy jańa kezeńniń bastalýy. Referendým halqymyzdyń Prezıdent reformalaryna zor senim artyp otyrǵanyn aıqyn kórsetti. Jańa Ata zańda mıllıondaǵan otandasymyzdyń talap-tilegi, úmiti men senimi kórinis tapty. Sondyqtan jańa Konstıtýsıanyń qabyldanýy – búkil halqymyzdyń jeńisi. Ol elimizdi tek bıik belesterge, uly murattarǵa jeteleı beredi dep senemin», – dedi ol.
Erlan Qoshanov jańa Konstıtýsıanyń qabyldanýy memleketimizdegi túbegeıli ózgeristerdiń bastamasy ekenin atap ótti. Endi jańa Konstıtýsıanyń árbir baby mańyzdy normaǵa aınalyp, adamdardyń ıgiligi jolynda qyzmet etýi úshin áli de kóp jumys atqarý qajet. Bul qoǵamnyń barlyq progresıvti tobynyń kúsh-jigerin biriktirýdi talap etedi, al «AMANAT» partıasy Prezıdenttiń saıası tiregi retinde osy jumystyń aldyńǵy shebinde bolýǵa tıis. Sondaı-aq ol «AMANAT» partıasynyń músheleri Jalpyulttyq Koalısıa quramynda aýqymdy túsindirý jumysyn júrgizgenin, elimizdiń barlyq óńirine barǵanyn, adamdardyń úmiti men tilegin jaqsy biletinin jáne endi olardyń tolyq oryndalýy mańyzdy ekenin atap ótti.
Jańa Konstıtýsıanyń qabyldanýyna oraı, jıyn barysynda «AMANAT» partıasynyń Úndeýi de qabyldandy. Qujat mátinin partıanyń Atqarýshy hatshysy Dáýlet Káribek oqyp berdi. Onda 15 naýryz kúni halyq tarıhı ári sanaly tańdaý jasap, Prezıdent Qasym-Jomart Toqaevtyń reformalar baǵytyna buryn-sońdy bolmaǵan qoldaý bildirgeni atap ótildi. Bul – qazaqstandyq azamattar senim artatyn, kún saıyn óz tıimdiligin dáleldep, memleketti oń ózgeristerge jeteleıtin jatqan baǵyt. Sonymen qatar «AMANAT» partıasy Memleket basshysynyń jetekshiligimen Ata Zań normalaryn júzege asyrý jáne órkendegen Qazaqstan qurý jolynda óziniń barlyq resýrsyn – Parlament pen máslıhattardaǵy fraksıalaryn, óńirlik fılıaldar jelisin, jastar jáne volonterler qurylymdaryn jumyldyratyny aıtyldy.
Otyrys barysynda fraksıa depýtattary da sóz sóıledi. Erlan Saırov geosaıası týrbýlenttilik pen turaqsyzdyq jaǵdaıynda Qazaqstanǵa memlekettiń turaqtylyǵyn saqtaýǵa múmkindik beretin jańa Konstıtýsıa qajet ekenin aıtty. Sergeı Ponomarev jańa Konstıtýsıa qoǵamdyq kelisimdi nyǵaıtyp, qazaqstandyq qoǵamnyń etnosaralyq birligi sıaqty negizgi gýmanıtarlyq qundylyqtardy saqtaıtynyn atap ótti. Nartaı Sársenǵalıev jańa Konstıtýsıany qoldaý isindegi jastar qaýymynyń belsendi róline nazar aýdardy. Onyń aıtýynsha, belsendi jastar tutas el aýmaǵynda myńdaǵan kezdesý ótkizdi. Sondaı-aq ol Konstıtýsıada volonterler qyzmetiniń bekitilýi jastardyń azamattyq belsendiligi artyp kele jatqanyn aıqyndaıtynyn atap ótti. Iýlıa Kýchınskaıa referendým qoǵamdyq pikirdiń aýqymdy «kórinisine» aınalyp, qazaqstandyqtardyń saıası kemeldigi men azamattyq jaýapkershiliginiń joǵary deńgeıin baıqatqanyn málimdedi. Al Erkin Ábil proporsıonaldy saılaý júıesin engizý jáne partıalardyń rólin kúsheıtý qadamy mazmundy saıası básekelestikke jaǵdaı jasaıtynyn atap ótti. Mundaı jaǵdaıda saılaýshylar eń aldymen kandıdattyń jeke tulǵasyn emes, onyń baǵdarlamasy men usynǵan ıdeıalaryn baǵalaıdy.
«AMANAT» partıasynyń baspasóz qyzmeti
Sýretti túsirgen: Álı Ǵalym, Talǵat Tanybaev
