Qazaqstandaǵy konstıtýsıalyq reforma tek saıası júıeni jańǵyrtýǵa ǵana emes, sonymen qatar eldiń uzaq merzimdi damýynyń negizgi resýrsy retinde adamı kapıtaldyń rólin kúsheıtýge baǵyttalǵan. Bul týraly Diplomatic World Institute jobalar dırektory Alberto Týrkstra Qazaqstan Respýblıkasynyń Prezıdenti janyndaǵy Qazaqstannyń strategıalyq zertteýler ınstıtýty (QSZI) men Maqsut Narikbayev University (MNU) birlesip uıymdastyrǵan «Qazaqstannyń jańa konstıtýsıalyq modeli: ornyqty ári zamanaýı memleket jolynda» atty halyqaralyq sarapshylar dóńgelek ústelinde málimdedi.

Sarapshynyń aıtýynsha, usynylyp otyrǵan konstıtýsıalyq reforma memlekettegi saıası jáne quqyqtyq arhıtektýrany jańǵyrtýǵa baǵyttalǵan keshendi bastama bolyp tabylady jáne ol ózgerip jatqan ekonomıkalyq, áleýmettik jáne saıası jaǵdaılardy eskeredi.

Týrkstra reformanyń jekelegen ınstıtýsıonaldyq ózgeristermen ǵana shektelmeıtinin atap ótti. Ol memlekettik ınstıtýttardyń tıimdiligin arttyrýǵa jáne bir mezgilde azamattardyń quqyqtary men bostandyqtaryn qorǵaýdy kúsheıtýge baǵyttalǵan keń aýqymdy negiz qalyptastyrady.

«Reforma eki maqsatty kózdeıdi: memlekettiń tıimdi jumys isteýin arttyrý jáne konstıtýsıalyq júıede azamattardyń ortalyq rólin nyǵaıtý», – dep atap ótti ol.

Sarapshy jańa konstıtýsıalyq modelde áleýmettik memleket tujyrymdamasynyń bekitilýine erekshe nazar aýdardy, onyń aıasynda adam damýy memlekettik saıasattyń negizgi maqsaty retinde qarastyrylady.

Onyń aıtýynsha, konstıtýsıalyq negiz Qazaqstannyń damýyndaǵy keń aýqymdy strategıalyq ózgeristi kórsetedi - negizinen ekonomıkalyq ósimge baǵyttalǵan modelden azamattardyń ál-aýqaty, múmkindikteri men qabiletteri basty basymdyqqa aınalatyn modelge kóshý.

Osy turǵyda, Týrkstra atap ótkendeı, jańa Konstıtýsıa adam ómiri, onyń qadir-qasıeti, quqyqtary men bostandyqtary memlekettiń eń joǵary qundylyqtary bolyp tabylatyn qaǵıdatty rastaıdy jáne memlekettik saıasattyń adamǵa baǵyttalǵan sıpatyn qalyptastyrady.