Almaty oblysynyń ákimi Marat Sultanǵazıev Naýryz merekesi qarsańynda Qonaev qalasyndaǵy Balalardy qoldaý ortalyǵyna arnaıy baryp, tárbıelenýshilermen júzdesti. Aımaq basshysy balalarmen birge aǵash kóshetterin otyrǵyzyp, tabıǵatty aıalaýǵa shaqyrdy. Ulystyń uly kúnimen quttyqtap, balalar men tárbıeshilerge izgi tilegin arnady.
«Qymbatty balalar! Búgingi bilimdi, zerek, izdenimpaz balalar – erteńgi eldiń tiregi. Qazir bilekke emes, bilimge senetin zaman. Sondyqtan ýaqytty tıimdi paıdalanyp, jaqsy oqyp, zamanaýı tehnologıalardy meńgerýge talpynǵan jón. Memleket tarapynan, sonyń ishinde Almaty oblysynyń ákimdigi tarapynan senderdiń sapaly bilim alýlaryńa, sportpen aınalysyp, óner men shyǵarmashylyqqa beıimdelýge barlyq jaǵdaı jasalýda. Bizdiń basty tilegimiz - senderdiń qanattaryń qataıyp, úlken azamat bolyp óskenderińdi kórý. Aralaryńnan el namysyn qorǵaıtyn chempıondar, ozyq oıly ǵalymdar men halqyna adal qyzmet etetin tulǵalar shyǵatynyna men kámil senemin. Elimizdiń erteńi - senderdiń qoldaryńda.
Qadirmendi tárbıeshiler! Sizderdiń kásibı biliktilikterińiz ben azamattyq ustanymdaryńyz úshin alǵys aıtamyn. Jastardyń boıyna ulttyq qundylyqtardy sińirip, olardy otanshyldyqqa tárbıeleý jolyndaǵy eńbekterińiz – elimizdiń baıandy bolashaǵyn qalyptastyrýǵa qosylǵan úlken úles», – dedi Marat Eleýsizuly.
Merekege oraı ulttyq naqyshta bezendirilgen ortalyq aldynda tárbıelenýshiler óz ónerlerin ortaǵa salyp, teatrlandyrylǵan qoıylym kórsetti.
Shara barysynda tanymal balmuzdaq óndirýshi – «Shın-Laın» kompanıasynyń táttileri taratyldy. Kompanıa basshysy Andreı Shın balalardy tátti balmuzdaqtar qalaı daıyndalatynyn kórip, óndiris jumysymen tanysýǵa shaqyrdy. Sondaı-aq aı saıyn ortalyqqa balmuzdaq ákelip turamyn degen ýádesin berdi. Ákimdik tarapynan jas ereksheligine qaraı kitaptar syıǵa tartylyp, ortalyqqa mýzykalyq qural-jabdyqtar berildi.
Marat Eleýsizuly balalarmen podkast formatynda áńgime órbitip, olardyń qoıǵan suraqtaryna jaýap berdi.
Ortalyq tárbıelenýshisi Vıtalıı Korshev: «Búgin bizdiń úıde Naýryz merekesi toılandy. Án shyrqap, bı bılep, tátti balmuzdaqtan da dám tattyq. Osyndaı múmkindik bergen jandarǵa raqmet», – degen lebizin bildirdi.
Almaty oblysynyń Bala quqyqtary jónindegi ýákili Aıgúl Esimbekova óńirdegi árbir balanyń quqyǵy men qaýipsizdigi baqylaýda ekenin aıtty.
«Qandaı da bir kúrdeli máseleler, ómirlik qıyn sátter týyndaǵan jaǵdaıda jedel kómek kórsetemiz. Ásirese osy Qonaev qalasyndaǵy Balalardy qoldaý ortalyǵy erekshe nazarymyzda. Munda jıi kelip turamyn. Tárbıelenýshilerdiń árqaısysyn jeke tanımyn. Munda óte jaqsy jaǵdaı jasalǵan. Olarmen bilikti mamandar jumys isteıdi. Bastapqyda minezi tuıyq, kópshilik arasynda qysylatyn balalar qazir ashylyp, ózin erkin sezinetin bolǵan. Túrli baǵyttaǵy is-sharalar joǵary deńgeıde uıymdastyrylyp, oǵan balalar úlken yqylaspen qatysady. Osy oraıda oblys ákimdigine erekshe alǵysymdy bildiremin. Marat Eleýsizuly únemi kezdesý ótkizip, balalardyń sapaly bilim alyp, jan-jaqty damýyna erekshe kóńil bóledi», – dedi Aıgúl Qanatqyzy.
Osylaısha shýaqty kóktemniń jylýyn ala kelgen Áz-Naýryzda balalardyń júregine de meıirim shýaǵy quıylyp, shattyqqa keneldi.
