AQSH prezıdenti Donald Tramp Kýba úkimetiniń áreketterine baılanysty ulttyq tótenshe jaǵdaı rejımin jarıalap, aralǵa munaı jetkizetin elderge qarsy qosymsha tarıfter engizý tetigin ázirleýdi tapsyrdy.
Prezıdenttiń jarlyǵynda Kýba bıliginiń saıasaty AQSH-tyń ulttyq qaýipsizdigi men syrtqy saıasatyna «ádetten tys ári tótenshe qaýip» tóndiredi dep kórsetilgen. Osyǵan baılanysty arnaıy ekonomıkalyq sharalardy iske qosý týraly sheshim qabyldandy.
Qujatta Gavana bıligi Reseı, Qytaı, Iran, sondaı-aq HAMAS pen «Hezbolla» uıymdarymen baılanys ornatqany aıtylǵan. AQSH málimetinshe, Kýba aýmaǵynda sheteldik áskerı jáne barlaý nysandary ornalasqan, onyń ishinde Reseıdiń radıoelektrondyq barlaý ortalyǵy bar.
Jarlyqqa sáıkes, AQSH Kýbaǵa tikeleı nemese janama túrde munaı satatyn elderden ımporttalatyn taýarlarǵa qosymsha kedendik baj salyǵyn engizýi múmkin. Mundaı elderdi Saýda mınıstri Memlekettik departamentpen birlesip anyqtaıdy. Al tarıf mólsheri boıynsha sońǵy sheshimdi prezıdent qabyldaıdy.
Sonymen qatar Kýba bıligi adam quqyqtaryn buzdy, óńirlik turaqsyzdyqqa yqpal etti dep aıyptaldy. Jarlyq 2026 jylǵy 30 qańtarda AQSH-tyń shyǵys ýaqyty boıynsha 00:01-de kúshine enedi.
