Almaty oblysynda «Jasyl bolashaq» jáne «Taza Qazaqstan» respýblıkalyq ekologıalyq aksıalary aıasynda aýqymdy senbilik ótip, oǵan 47 myńnan astam adam qatysty
25 sáýir kúni ótken ekologıalyq shara barysynda óńir boıynsha 762 gektardan astam aýmaq tazartylyp, 2307 tonnadan astam qoqys shyǵaryldy. Sonymen qatar, 21 myńnan astam kóshet otyrǵyzyldy. Jalpyoblystyq aksıaǵa 287 birlik tehnıka jumyldyryldy.
Aýqymdy aksıanyń basty oqıǵalarynyń biri Qonaev qalasynda uıymdastyryldy. Berdibek Soqpaqbaev atyndaǵy ortalyq saıabaqta Memleket basshysy Qasym-Jomart Toqaevtyń qatysýymen telekópir ótip, onyń aıasynda 100 túp aǵash egildi.
Ekologıalyq aksıa óńirdiń birneshe aýdanyn qamtydy. İle aýdanynda 2093 adam qatysyp, 1290 túp aǵash otyrǵyzylyp, 77,1 tonna qoqys shyǵaryldy. Talǵar aýdanynda 600 túp kóshet egilse, Qarasaı aýdanynda «Altyn taǵa» zaýytynyń qoldaýymen 1000 túp aǵash otyrǵyzylyp, senbilikke 5000-nan astam adam jumyldyryldy.
Sharaǵa qoǵam belsendileri, jastar uıymdary, eriktiler, kásipkerler men qala turǵyndary qatysty.
Oblys ákimdiginiń málimetinshe, mundaı aksıalar turǵyndardyń qorshaǵan ortaǵa jaýapkershiligin arttyryp, tazalyq mádenıetin nyǵaıtýǵa yqpal etip keledi.
Aıta keteıik, Prezıdent bastamasymen júzege asyp jatqan «Taza Qazaqstan» baǵdarlamasy aıasynda Almaty oblysynda júıeli jumystar jalǵasýda. Bıyl 28 aqpan men 23 sáýir aralyǵynda óńirde 697 is-shara uıymdastyrylyp, oǵan 344 myńnan astam adam qamtylǵan. Osy kezeńde 59 myńnan astam aǵash otyrǵyzylyp, 1979 tonna qoqys shyǵarylǵan.
2026–2030 jyldarǵa arnalǵan josparǵa sáıkes, Almaty oblysynda jyl saıyn shamamen 220 myń túp aǵash otyrǵyzý kózdelgen. Búgingi ekologıalyq aksıalar memlekettik bastamalardyń naqty nátıjesin kórsetip qana qoımaı, qoǵamnyń ortaq iske jumyla alatynyn taǵy bir márte dáleldedi.
