Ál-Farabı atyndaǵy Qazaq ulttyq ýnıversıtetinde «Ortalyq Azıa – Ońtústik Kavkaz – Taıaý Shyǵys úshtaǵanyndaǵy qaýipsizdik, geosaıasat jáne túrki ıntegrasıasy» atty halyqaralyq ǵylymı-praktıkalyq konferensıa ótti.
İs-shara 2026 jylǵy 29-30 sáýirde QazUÝ-dyń halyqaralyq qatynastar fakúltetinde uıymdastyryldy. Konferensıa jumysy qazaq, orys jáne aǵylshyn tilderinde júrgizildi.
Konferensıany ál-Farabı atyndaǵy QazUÝ halyqaralyq qatynastar fakúltetiniń halyqaralyq qatynastar jáne álemdik ekonomıka kafedrasy, Aımaqtyq qatynastardy taldaý ortalyǵy jáne Halyqaralyq ǵylymdy damytý ortalyǵy uıymdastyrdy.
Konferensıa PhD, dosent mindetin atqarýshy Ádilbek Alpysbaıuly Ermekbaev jetekshilik etetin AP22788787 «Qazaqstannyń ulttyq múddelerin qamtamasyz etý kontekstinde Halyqaralyq Transkaspıı baǵytyn iske asyrýdaǵy syn-qaterler men múmkindikter» jáne AP23483774 «Túrki ıntegrasıasyn tereńdetý: Qazaqstan úshin perspektıvalar, geosaıası táýekelder men qaýipter» ǵylymı jobalary aıasynda júzege asyryldy.
Konferensıaǵa Qazaqstan, Ázerbaıjan, Túrkıa, Úndistan, Pákistan, Qyrǵyzstan, Ózbekstan, Armenıa, Grýzıa, Reseı jáne Ulybrıtanıadan kelgen 100-ge jýyq ókil qatysty. Paneldik sesıalarda 25 ýnıversıtet, ǵylymı-zertteý ınstıtýty, taldaý ortalyǵy jáne sarapshylyq uıymnan 40-qa jýyq ǵalym men sarapshy baıandama jasady.
Qatysýshylarǵa quttyqtaý sózdi ál-Farabı atyndaǵy QazUÝ halyqaralyq qatynastar fakúltetiniń dekany, zań ǵylymdarynyń kandıdaty, profesor Juldyz Talǵatqyzy Saırambaeva jáne Halyqaralyq ǵylymdy damytý ortalyǵy bas dırektorynyń orynbasary Oleg Balybekuly Esenov arnady.
Konferensıa barysynda Ortalyq Azıa, Ońtústik Kavkaz jáne Taıaý Shyǵys keńistigindegi qaýipsizdik máseleleri, geosaıası ózgerister, túrki ıntegrasıasynyń keleshegi, halyqaralyq kólik dálizderi, Transkaspıı halyqaralyq kólik baǵyty, Orta dáliz jáne óńirlik yntymaqtastyqtyń ózekti baǵyttary talqylandy.
Sarapshylar Qazaqstannyń óńiraralyq baılanystardy damytýdaǵy, kólik-logıstıka baǵyttaryn ilgeriletýdegi jáne halyqaralyq ǵylymı-sarapshylyq dıalogty nyǵaıtýdaǵy róline erekshe nazar aýdardy.
Konferensıa qorytyndysy boıynsha qatysýshylar ǵylymı jáne sarapshylyq yntymaqtastyqty keńeıtý, birlesken zertteýlerdi damytý jáne óńirlik qaýipsizdik, geoekonomıka men ıntegrasıalyq úderister boıynsha turaqty akademıalyq dıalogty jalǵastyrý qajettigin atap ótti.
