Óńirde barlyǵy 677 saıajaı qaýymdastyǵy bar, olardyń 367-si 2023 jyldan beri eldi mekender quramyna engizildi.

Saıajaı alqaptarynyń eń kóbi Qarasaı aýdanynda – 203, İle aýdanynda – 118, Talǵar aýdanynda – 151, Eńbekshiqazaq aýdanynda – 135, sondaı-aq Jambyl aýdanynda – 21. Qonaev jáne Alataý qalalarynda tıisinshe 9 jáne 40 saıajaı alqaby ornalasqan.

2025 jyly tórt eldi mekenniń quramyna 23 baý-baqsha qaýymdastyǵyn engizý úshin qala qurylysy qujattamasyn daıyndaý aıaqtaldy. Qazirgi ýaqytta shekaralardy ózgertý jumysy júrgizilýde. Osydan keıin saıajaı turǵyndary resmı túrde aýyl turǵyny mártebesine ıe bolady. Máselen, Qarasaı aýdanynda Kólashy aýylyna «Aımóldir» baý-baqsha qaýymdastyǵyn jáne ataýy joq taǵy bir alqapty qosý josparlanǵan.

Turar aýylyna bir saıajaı alqaby, al Bekbolat aýylyna «Saıan» baý-baqsha qaýymdastyǵy engiziledi. Eńbekshiqazaq aýdanynda Azat aýylynyń quramyna «Entýzıast», «Almagúl 2», «Arman 2», «Zvezdochka», «Vıktorıa», «Dostyq» jáne basqa da birqatar baý-baqsha seriktestikteri qosylady. Bıyl taǵy úsh eldi meken boıynsha qujattar ázirlenip, olardyń quramyna 47 saıajaı seriktestigin engizý josparlanyp otyr. Atap aıtqanda, Eńbekshiqazaq aýdanynda Bólek aýylyna «Kıroves-37», «Drýjba», «Taýgúl», «Jetisý», «Esik», «Romashka» jáne basqa da ondaǵan alqapty qosý kózdelgen.

Qarasaı aýdanynda Ulan jáne Kemertoǵan aýyldary quramyna «Kashtan», «Jaıyq», «Shyǵys Agro», «Nur Plaza», «Navat» jáne «Alash Orda» alqaptary engiziledi.

Jerdiń nysanaly maqsatyn ózgertý máselesi saıajaı turǵyndary úshin ózekti bolyp qala beredi. Bul múmkindik eldi mekenderdiń bas jospary men qala qurylysy qujattamasyna sáıkestigine baılanysty qarastyrylady. Iaǵnı nysanaly maqsatty ózgertý tek bas jospar men egjeı-tegjeıli josparlaý jobalaryna sáıkes kelgen jaǵdaıda ǵana ruqsat etiledi.